އަލް-ޤައެދާގެ ކުރީގެ ލީޑަރ، އުސާމާ ބިން ލާދެންގެ ދަރި، ހަމްޒާ ބިން ލާދެން ހޯދާދިން މީހަކަށް 1 މިލިއަން ޑޮލަރުގެ އިނާމެއް އެމެރިކާއިން ކަނޑައަޅައިފިއެވެ.
ހަމްޒާ ވަނީ އަލް ޤައެދާގެ ލީޑަރު ކަމަށް އައުމަށް މަސައްކަތް ކުރަމުންނެވެ. އޭނާ ވަނީ އޭނާގެ ބައްޕަ، އުސާމާ އަދި އަލް ޤައެދާގެ ވާގިވެރިންނަށް އެމެރިކާއާއި އެމެރިކާ އެލަޔެންސުގައި ހިމެނޭ ގައުމުތަކަށް ހަމަލާ ދިނުމަށް ގޮވާލައި އޯޑިއޯ އަދި ވީޑިއޯ މެސެޖުތައް އާންމު ކުރަމުންނެވެ.
ސައުދީގެ ރަށްވެއްސެއް ކަމަށްވާ ހަމްޒާގެ ރަށްވެހިކަން ސައުދީ އަރަބިއްޔާއިން ވަނި މިހާރު އަތުލާފައެވެ. ނަމަވެސް ހަމްޒާ ވަނީ މާކުރިން ސައުދީ ދޫކޮށް ފިލާފައި ކަމަށް ޚަބަރު ލިބެއެވެ. އޭނާ މިހާރު ހުރީ އަފްޣާން-ޕާކިސްތާނު ބޯޑަރު ސަރަހައްދުގައި ކަމަށް އަޑުފެތުރިފައިވެއެވެ.
ހަމްޒާ ވަނީ މިދިޔަ އަހަރު ސައުދީގެ ރަސްގެފާނާއި ޝާހީ އާއިލާއާ ދެކޮޅަށް ހަމަލާ ދިނުމަށް ގޮވާލައި މެސެޖެއް ފޮނުވާފައެވެ. ނަމަވެސް އޭރު ސައުދީން އެކަމަށް މާބޮޑު ސަމާލުކަމެއް ނުދިނީ އޭނާގެ ބާރެއް ނެތް ކަމަށް ހީކޮށެވެ.
އެމެރިކާ ޖާސޫސީ އިދާރާތަކަށް ހަމްޒާގެ ބާރު އަލްޤައެދާ ތެރޭގައި ގަދަވަމުންދާ ކަމަށް މައުލޫމާތު ލިބި އެކަމާ ގުޅިގެން އޭނާ ހައްޔަރުކުރުމުގެ މަސައްކަތް މިހާރު ވަނީ ފަށާފައެވެ.
އޮބާމާގެ ވެރިކަމުގައި އެމެރިކާ އަސްކަރިއްޔާ އަދި ސީއައިއޭ ގުޅިގެން ހިންގި އޮޕަރޭޝަނެއްގައި، 2011 ވަނީ އުސާމާ އަތުލައިގަތުމަށް ފަހު ވަނީ މަރާލާފައެވެ. އަދި އޭނާގެ ހަށިގަނޑު ކަނޑުފައްތާލާފައިވާ ކަމަށް އަސްކަރިއްޔާއިން ބުނެއެވެ. ހަމްޒާ މިހާރު މަސައްކަތް ކުރަމުން އަންނަނީ އޭނާގެ ބައްޕަ މަރާލުމުން އެކަމުގެ ބަދަލު ހިފުމަށް ކަމަށް ބުނެފައިވެއެވެ.