އިންޑިއާގެ ކޮންޓްރޯލް އޮންނަ ކަޝްމީރް އާއި ޕާކިސްތާނުގެ ބާރު އޮންނަ ކަޝްމީރްގެ ބޯޑަރު ކަމުގައިވާ ލައިން އޮފް ކޮންޓްރޯލް ކައިރީގައި ހިނގަމުން އަންނަ ހަމަނުޖެހުންތަކަށް އަދިވެސް ފިނިކަމެއް ނުލިބެއެވެ.
ޕާކިސްތާންގެ އަސްކަރިއްޔާގެ މީޑިއާ ވިންގް ކަމުގައިވާ އިންޓަ-ސަރވިސަސް ޕަބްލިކް ރިލޭޝަންސް (އައިއެސްޕީއާރް) އާއި ހަވާލާދީ "ސީއެންއެން" އިން ރިޕޯޓްކުރާ ގޮތުގައި އިންޑިއާ ސިފައިންނާއެކު ބަދަލުކުރި ބަޑީގެ ހަމަލާތަކެއްގައި ޕާކިސްތާން އަސްކަރިއްޔާގެ ދެ ސިފައިން ވަނީ މަރުވެފައެވެ. މި ހާދިސާގައި އާންމުންގެ ހަ މީހަކުވެސް ވަނީ މަރުވެފަ އެވެ.
އަސްކަރިއްޔާރިން ނެރުނު ބަޔާނުގައި ބުނެފައި ވަނީ އެ ހަމަލާތައް ހިނގާފައި ވަނީ ނަކިޔާލް ސެކްޓަރުގައި ކަމަށެވެ.
އެ ހަމަލާތަކުގައި މަރުވެފައިވާ ދެ އޮފިސަރުންނަކީ ހަވަލްދާރް އަބްދުރް ރަބް އާއި ނައިކް ޚުރާމް އެވެ.
އައިއެސްޕީއާރް އިން ރިޕޯޓްކުރާ ގޮތުގައި މި ހަމަލާތަކުގައި އިންޑިއާގެ އަސްކަރިއްޔާ އަށް ވެސް ވަނީ ގެއްލުންތަކެއް ލިބިފައެވެ.