ދެކުނު އަފްޣާނިސްތާންގެ ހެލްމޭންޑް ޕްރޮވިންސްގެ މިލިޓަރީ ބޭސް އަކަށް ދިން ހަމަލާއެއްގައި މަދުވެގެން 23 ސިފައިން މަރުވެފައިވާ ކަމަށް އޮފިޝަލުން ބުނެފި އެވެ.
އަފްޣާނިސްތާންގެ އެންމެ ބޮޑު އެއް މިލިޓަރީ ބޭސް ކަމުގައިވާ ޝޯރަބް އިއްޔެ އިރާކޮޅު ދިން މި ހަމަލާ އެތައް ގަޑިއިރަކަށް ދިގުދެމިގެން ގޮސްފައި ވެއެވެ. ތާލިބާނުން ވަނީ މި ހަމަލާގެ ޒިންމާ ނަގާފައެވެ.
އޮފިޝަލުން ބުނާ ގޮތުގައި މިއީ 48 ގަޑިއިރުގެ ތެރޭގައި އެ ބޭސް އަށް ތާލިބާނުން ދިން ތިންވަނަ ހަމަލާއެވެ.
މިނިސްޓްރީ އޮފް ޑިފެންސްގެ ތަރުޖަމާނު ޣަފޫރް އަހްމަދު ޖާވިދު އާއި ހަވާލާދީ "އަލްޖަޒީރާ" އިން ރިޕޯޓްކުރާ ގޮތުގައި އެ ހަމަލާގައި ސިފައިންގެ 23 އޮފިސަރަކު މަރުވެފައިވާއިރު، އިތުރު 15 މީހަކު ޒަޚަމްވެ، 20 އިންސާޖެންޓުން ވަނީ މަރުވެފަ އެވެ.
އަފްޣާންގެ އަސްކަރިއްޔާއަށް އެހީތެރިވާ ޔޫއެސް އެޑްވައިޒް އެންޑް އެސިސްޓް މިޝަން ވެސް އޮޕަރޭޓް ކުރާނީ އެ ބޭސްއިންނެވެ. ނަމަވެސް އެ ޓީމް އޮޕަރޭޓް ކުރަނީ އެ ބޭސްގެ އެހެން ސަރަޙައްދަކުންނެވެ.
ސެކިއުރިޓީ އޮފިޝަލުން ބުނާ ގޮތުގައި އެ ބޭސްގައި ތިބި އެމެރިކާގެ އަދި ބައިނަލްއަޤްވާމީ ބާރުތަކުން ތިބި ސަރަޙައްދުގެ ފާރު ތާލިބާނަށް ހަލާކުކޮށްނުލެވުމުގެ ސަބަބުން އެމީހުންނަށް ހަމަލާދިނުމުގައި ތާލިބާނުން ވަނީ ނާކާމިޔާބުވެފައެވެ.