ހޮލީވުޑްގެ އެކްޓްރެސް ކެތަރިން ހެލްމަންޑް، އުމުރުން 89 އަހަރުގައި މަރުވެއްޖެ އެވެ.
އޭނާގެ އޭޖެންސީ އާއި ހަވާލާދީ "ބީބީސީ" އިން ރިޕޯޓްކުރާ ގޮތުގައި ކެތަރިން މަރުވެފައި ވަނީ މިދިޔަ ފެބްރުއަރީ މަހުގެ 23 ވަނަ ދުވަހު، ލޮސް އެންޖެލިސްގައި ހުންނަ އޭނާގެ ގޭގައި، އަލްޒައިމާސް ބަލީގެ މައްސަލަތަކެއްގެ ސަބަބުން ކަމަށެވެ.
ސިޓްކޮމް "ހޫޒް ދަ ބޮސް؟" އާއި "ސޯޕް"ގައި ކެތަރިން އަދާކުރި ރޯލްތަކަށް އޭނާ އަށް ވަނީ ދެ ގޯލްޑެން ގްލޯބްސް އެވޯޑް ވެސް ލިބިފައެވެ.
ހަތް ފަހަރު އެމީ އެވޯޑަށް ނޯމިނޭޓްވެފައިވާ ކެތަރިން ވަނީ ގިނަ އަދަދެއްގެ ފިލްމްތަކާއި ޓީވީ ޝޯތަކުގައި މަސައްކަތްކޮށްފައެވެ. އެގޮތުން އޭނާގެ އެންމެ މަޝްހޫރު މަސައްކަތްތަކުގެ ތެރޭގައި "އެވްރިބޮޑީ ލަވްސް ރޭމަންޑް" އާއި ޑިޒްނީ ޕިކްސަރގެ "ކާސް" ވެސް ހިމެނެއެވެ.
ކެތަރިންގެ ފިރިމީހާ، ޑޭވިޑް ކްރިސްޓިއަން ނެރުނު ބަޔާނެއްގައި ބުނެފައި ވަނީ ކެތަރިން އަކީ އޭނާގެ ދިރިއުޅުމުގެ ލޯބި ކަމަށެވެ.
ޑޭވިޑް ބުނީ އޭނާ ކެތަރިން އާއެކު އުޅެމުން އަންނަނީ އުމުރުން 19 އަހަރުއްސުރެ ކަމަށާއި، ކެތަރިން މަރުވި ރޭ އޭނާ ފަދައިން ހަނދުވެސް ހުރީ ދެބައިކުޅަ އެއްބައަށް ފުރިހަމަވެފައި ކަމަށެވެ.
ޓީވީ އާއި ފިލްމްތަކުގެ އިތުރުން ޓެކްސަސް އަށް އުފަން ކެތަރިން އަކީ ސްޓޭޖް މަތިން ވެސް ކާމިޔާބީ ހޯދާފައިވާ މީހެކެވެ. އެގޮތުން ބްރޯޑްވޭގައި "ދަ ގްރޭޓް ގޯޑް ބްރައުން"ގައި އޭނާ ކުރި މަސައްކަތަށް 1973 ވަނަ އަހަރު ކެތަރިން ވަނީ ޓޯނީ އެވޯޑަކަށް ވެސް ނޯމިނޭޓްވެފަ އެވެ.