އިންޑިޔާ އާއި ޕާކިސްތާނާ ދެމެދު އުފެދިފައިވާ ނުތަނަވަސްކަމުގެ ތެރޭގައި މަޝްހޫރު ފިލްމީ ތަރި، ޕްރިޔަންކާ ޗޯޕްރާ އަމިއްލަ ގައުމުގެ އަސްކަރިއްޔާ ދިފާއުކޮށް ކުރެއްވި ޓުވީޓަކާ ގުޅިގެން، ޔުނިސެފްގެ ގުޑްވިލް އެމްބެސެޑަރުކަމުގެ މަގާމު ޕްރިޔަންކާ އަތުން އަތުލުމަށް ޕާކިސްތާނު ރައްޔިތުންގެ ގޮވާލައި ޕެޓިޝަނެއް ހުށައަޅައިފިއެވެ.
ޕެޓިޝަން ފަށާފައިވަނީ ޕާކިސްތާނުގައި ތިބި ޕްރިޔަންކާގެ ފޭނުންނެވެ. އެ ޕެޓިޝަނުގައި މިހާރު އެގައުމުގެ އާންމު ރައްޔިތުން ވެސް ވަނީ ބައިވެރިވާން ފަށާފައެވެ. އަދި ޕްރިޔަންކާގެ މިއަމަލަކީ ހަނގުރާމައަށް ހިތްވަރުދޭ ކަމެއް ކަމަށް އެމީހުން ވަނީ ސިފަކޮށްފައެވެ.
ޕްރިޔަންކާ ފޮނުވި ޓުވީޓުގައި ބުނެފައިވަނީ "ޖޭ ހިންދު އިންޑިއަން އާމްޑް ފޯސަސް" މިހެންނެވެ. އެކަމާ ރުޅިގަދަވެ ޕާކިސްތާނުގެ ވަރަށް ގިނަ ބަޔަކު މިހާރު ވަނީ ސޯޝަލް މީޑިޔާގައި ޕްރިޔަންކާއަށް ފާޑުކިޔާފައެވެ.
އިންޑިޔާ ޕާކިސްތާން ކޯޅުމަށް ނިމުމެއް ގެނައުމަށް ޕާކިސްތާނުގެ ބޮޑުވަޒީރު، އިމްރާން ޚާން ވަނީ ސުލްހައިގެ ވާހަކަތަކަށް ފުރުސަތު ހުޅުވާލާފައެވެ. ޕާކިސްތާނު ތެރެއަށް ގަވާއިދާއި ޚިލާފަށް ވަން އިންޑިޔާ އަސްކަރިއްޔާ ބޯޓެއްގެ ޕައިލަޓް ހައްޔަރުކުރުމަށް ފަހު ޕާކިސްތާނުން ވަނީ އެއްވެސް ޝަރުތެއް ނެތި އޭނާ މިހާރު މިނިވަން ކޮށްފައެވެ.