ރައްޔިތުންގެ މަޖިލީހުގެ އިންތިހާބުގައި ބޭނުން ކުރާ ވޯޓް ކަރުދާސް ޗާޕު ކޮށްދޭނެ ފަރާތެއް ހޯދުމަށް އިލެކްޝަން ކޮމިޝަނުން (އީސީ) އިއުލާންކޮށްފި އެވެ.
އީސީން އިއްޔެ ކުރި އިއުލާނުގައި ބުނީ އެ ކޮމިޝަނުންދޭ މައުލޫމާތާއި އެއްގޮތަށް ރައްޔިތުން މަޖިލީހުގެ އިންތިހާބުގެ ވޯޓު ކަރުދާސް ޗާޕުކޮށްދޭނެ ފަރާތެއް ހޯދަން ބޭނުންވާ ކަމަށެވެ.
އެގޮތުން އެކަމާ ގުޅޭގޮތުން މައުލޫމާތު ސާފުކޮށްދިނުން މާދަމާ 14:00 ގައި އެކޮމިޝަނުގައި އޮންނާނެ ކަމަށާއި މިމަހު 10 ވަނަ ދުވަހުގެ ކުރިން އަންދާސީ ހިސާބު ހުށަހަޅަން ޖެހޭނެ ކަމަށް އީސީން ކުރި ޢިއުލާންގައި ވެއެވެ.
މިމަހު 10 ވަނަ ދުވަހުގެ 14:00 ގައި އިލެކްޝަންސް ކޮމިޝަން ގައި ބީލަން އޮންނާނެ ކަމަށާއި މައުލޫމާތު ދިނުމަށް ބާއްވާ ބައްދަލުވުމަށް ހާޒިރުނުވާ ފަރާތްތަކާއި، ގަޑިޖެހުމަށްފަހު ހުށަހަޅާ ބީލަންތައް ބަލައިނުގަނެ އަނބުރާ ރައްދު ކުރެވޭނެ ކަމަށް ވެސް އީސީން ވަނީ ބުނެފައެވެ.
ވޯޓު ކަރުދާސް ޗާޕްކޮށްދޭނެ ފަރާތެއް ހޯދަން އީސީ އިން އިއުލާން ކޮށްފައިވާއިރު، އިންތިހާބަށް ވޯޓު ކަރުދާސް ޕްރިންޓް ކުރުމުގައި ފުލުހުންގެ ދައުރު ބޮޑު ކުރަން އިލެކްޝަންސް ކޮމިޝަނުން ވަނީ ފުލުހުންނާ މަޝްވަރާކޮށްފައެވެ.
އެގޮތުން މަޖިލީހުގެ އިންތިހާބުގައި އީސީ އާއި ފުލުހުން އެއްބާރުލުން ދިނުމާ ގުޅޭ ގޮތުން ބޭއްވި މަޝްވަރާތަކުގައި ވޯޓު ފޮށިތައް އުފުލުމާއި ސަލާމަތީ ލޮޖިސްޓިކް މަސައްކަތްތަކުގައި ފުލުހުންނާ ގުޅިގެން މަސައްކަތް ކުރިއަށް ގެންދާނެ ގޮތްތަކާ މެދު ވެސް ވަނީ މަޝްވަރާ ކޮށްފައެވެ.
މިދިޔަ އަހަރު ބޭއްވި ރިޔާސީ އިންތިހާބުގެ ވޯޓު ކަރުދާސް ޗާޕްކޮށްދީފައި ވަނީ އެމް 7 ޕްރިންޓާސް އިންނެވެ. އެގޮތުން އެމް7 އިން ވަނީ 264,756 (ދެލައްކަ ފަސްދޮޅަސް ހަތަރުހާސް ހަތްސަތޭކަ ފަންސާސް ހައެއް) ވޯޓު ކަރުދާސްކޮޅު ޗާޕުކޮށްދީފައެވެ.