މަޖިލީހުގެ 135 މެމްބަރުންގެ މައުލޫމާތާއި، 209 ބިލުގެ މައުލޫމާތު ހިމަނައިގެން 'މަގޭ އެމްޕީ' ގެ ނަމުގައި ވެބްސައިޓެއް ތަޢާރަފު ކޮށްފި އެވެ.
މިވެބްސައިޓަކީ ރައްޔިތުންގެ މަޖިލީހުގެ މެމްބަރުން އެ މެމްބަރެއްގެ ދައުރުގައި މަޖިލީހުގެ ތަޅުމަށް ހުށަހެޅުނު ބިލްތަކަށް ވޯޓުދެއްވާފައިވާ ގޮތް ފަސޭހައިން ބަލާން ތަޢާރަފު ކުރި ވެބްސައިޓެއް ކަމަށް ކަޓްރާންސްޕޭރަންސީ މޯލްޑިވިސް (ޓީއެމް) އިން ބުނެއެވެ.
https://www.mageymp.org
މަޖިލީހުގެ މެމްބަރުން ޒިންމާދާރުކުރުމަށް މަގުފަހިކުރުމުގެ ބޭނުމުގައި އުފެއްދި މި ވެބްސައިޓުން މެމްބަރެގެ ޕްރޮފައިލް ވަކިވަކިން ނަގައި އެ މެމްބަރެއް ވޯޓުދީފައިވާ ގޮތް ޓީއެމްގެ ވެބްސައިޓުން ބަލާލަން މާފަސޭހަ ވާނެ ކަމަށް ޓީއެމްއިން ބުނެއެވެ.
އެގޮތުން ކޮންމެ މެމްބަރެއްގެ ޕްރޮފައިލް ނެގުމުން، އޭނާގެ ފޭސްބުކް އައިޑީ، ޓްވިޓާ އައިޑީ އަދި ފޯނު ނަންބަރުގެ އިތުރުން އޭނާގެ ދައުރުގައި މަޖިލީހުގައި ވޯޓަށް އަހާފައިވާ ބިލްތަކުގެ ލިސްޓު ފެނެއެވެ.
އަދި އެ ބިލަށް އޭނާ ވޯޓު ދީފައިވޭތޯ ނުވަތަ ނުވޭތޯ ބަލައިލުމުގެ އިތުރުން އެ ދުވަހު މަޖިލީހަށް ހާޒިރުނުވާ ނަމަ އެކަން ވެސް ވެބްސައިޓުން ފެންނަން އޮވެ އެވެ.
މިހާރު ތައާރަފު ކޮށްފައިވަނީ ވެބްސައިޓުގެ ބީޓާ ވާޝަނެވެ. ނަމަވެސް ކުރިއަށް އޮތް ތަނުގައި މި ވެބްސައިޓު އިތުރަށް ތަރަށްގީކުރަމުން ގެންދާނެކަމަށް އެ ޖަމިއްޔާއިން ބުނެއެވެ. އެގޮތުން ތީމްތަކަށް ބަހާލައިގެން ބިލުތައް ނެގޭނެ އިންތިޒާމާއި، ވެބްސައިޓު ބޭނުންކުރާ މީހުން ބޭނުންވާ މައުލޫމާތު ރިޕޯޓެއްގެ ގޮތުގައި ޑައުންލޯޑު ކުރެވޭނެ އިންތިޒާމުގެ ވެސް ކުރިއަށް އޮތްތަނުގައި ތައާރަފުކުރުމަށް ނިންމާފައިވާކަމަށް ވެސް ޓީއެމްއިން ވަނީ ބުނެފައެވެ.