ސ. ގަމުން ދަތުުރު ކުރާ ފަރާތްތަކަށް ވަރަށް ޚާއްސަ ދެ ޕްރޮމޯޝަނެއް ސްރީލަންކަން އެއާލައިންސުން ފަށައިފިއެވެ.
އެގޮތުން ދިވެހިން އާއްމުކޮށް ޗުއްޓީ ހޭދަކޮށްލުމަށާއި ބޭސްފަރުވާ އަށް އަދި ވިޔަފާރިއަށްދާ ދެ މަންޒިލް ކަމަށްވާ އިންޑިއާގެ ބެންގަލޫރާއި އާއި ތައިލެންޑްގެ ބެންކޮކަށް ވަރަށް ޚާއްސަ ފެއާއެއްގެ ދަށުން ދަތުރުކުރެވޭނެ ގޮތް ވަނީ ހަމަޖައްސާފައެވެ.
ސްރީލަންކަން އިން ބުނީ ގަމުން ބެންގަލޫރަށް ދަތުރުކުރާ ފަރާތްތަކަށް ކޮޅަކަށް 180 ޑޮލަރަށް އަދި ދެކޮޅަށްނަމަ 338 ޑޮލަރަށް ޓިކެޓް ނެންގެވޭނެ ކަމަށެވެ.
މީގެ އިތުރުން ވެސް ތައިލެންޑްގެ ވެރިރަށް ބެންކޮކަށް ވެސް ދަތުރުކުރާ ފަރާތްތަކަށް ވަރަށް ޚާއްސަ ޕްރޮމޯޝަނެއް ސްރީލަންކަން އިން ވަނީ ފަށައިފަ އެވެ. އެ ޕްރޮމޯޝަންގެ ދަށުން ގަމުން ބެންކޮކަށް ދަތުރުކުރާ ފަރާތްތަކަށް ދެކޮޅު ޓިކެޓް 464 ޑޮލަރަށް ލިބޭނެކަމަށް އެ އެއާލައިން އިން ބުނެއެވެ.
ސްރީލަންކަން އިން ބުނީ މި ޕްރޮމޯޝަންތަކުގެ ދަށުން ދަތުރުކުރައްވަން ބޭނުންފުޅު ފަރާތްތަކުން މި ހިނގާ މާޗު މަހުގެ 15ގެ ނިޔަލަށް ޓިކެޓް ނަންގަވަން ޖެހޭނެ ކަމަށާއި، މި ޕްރޮމޯޝަންގެ ދަށުން މި މުއްދަތުގައި ޓިކެޓް ނަންގަވާ ފަރާތްތަކަށް މާޗު 01 އިން ފެށިގެން ނޮވެމްބަރ މަހުގެ 30 ވަނަ ދުވަހާއި ހަމައަށް ދަތުރު ކުރެވޭނެ ކަމަށެވެ.
ސްރީލަންކަންގެ މި ޕްރޮމޯޝަންތަކާއި ގުޅޭ މައުލޫމާތުތަކާއި، ރިޒަވޭޝަން ހެއްދުމަށް ސްރީލަންކަންގެ ޖެނެރަލް ސޭލްސް އެޖެންޓް އޮފީހުގެ މޮބައިލް ނަންބަރ 7978966 އަށް ވައިބަރ ނުވަތަ ފޯނުކޮށްގެންނާއި salesgan@aceaviation.mv އަށް އީމެއިލްކޮށްގެން މައުލޫމާތު ސާފު ކުރެއްވޭނެއެވެ.