ނިމިގެންދިޔަ 2018 ވަނަ އަހަރުގެ ތެރޭގައި ޖުމްލަ 2،543 މީހެއްގެ މައްޗަށް ދައުވާ ކުރުމަށް ކޯޓުތަކަށް ފޮނުވާފައިވާ ކަމަށް ޕްރޮސެކިއުޓަރ ޖެނެރަލް (ޕީޖީ) އޮފީހުން ބުނެފި އެވެ.
ޕީޖީ އޮފީހުން މިއަދު އާންމުކުރި އެ އޮފީހުގެ އަހަރީ ރިޕޯޓްގައިވާ ގޮތުން، ސުޕީރިއާ ކޯޓުތަކަށް 2،004 މީހެއްގެ މައްސަލަ ހުށަހަޅާފައިވާއިރު، މެޖިސްޓްރޭޓް ކޯޓުތަކަށް ހުށަހަޅާފައި ވަނީ 530 މީހެއްގެ މައްސަލައެވެ. އެގޮތުން 980 މީހެއްގެ މައްޗަށް ދައުވާކުރުމަށް ކްރިމިނަލް ކޯޓަށް ހުށަހަޅާފައިވާއިރު، 973 މީހެއްގެ މައްސަލަ ހުށަހަޅާފައި ވަނީ ޑްރަގް ކޯޓަށެވެ. އަދި ޖުވެނައިލް ކޯޓަށް ހުށަހަޅާފައި ވަނީ 51 މައްސަލައެވެ.
ޕީޖީ އޮފީހުން ދައުވާކުރަން ފޮނުވި މީހުންގެ ތެރޭގައި 100 އަންހެނުންނާއި 2،434 ފިރިހެނުން ހިމެނޭއިރު، 18 އަހަރުން ދަށުގެ 75 ކުއްޖަކު ވެސް ހިމެނެއެވެ.
މީގެ އިތުރުން ދައުވާކޮށްދިނުމަށް ތަޙުޤީޤީ އިދާރާތަކަުން މިދިޔަ އަހަރު ހުށަހެޅި މައްސަލަތަކުގެ ތެރެއިން 2،228 މައްސަލައެއްގައި ޕީޖީ އިން ފިޔަވަޅު އަޅާފައިވާއިރު، 1790 މީހެއްގެ މައްސަލަ ދައުވާކުރަން ކޯޓަށް ހުށަހަޅާފައިވެއެވެ. އަދި 87 މީހުންގެ މައްސަލަ ހެއްކާއި ޤަރީނާ ނެތިގެން އަނބުރާ ފޮނުވާލާފައިވާއިރު، އަލުން ހުށަހެޅުމަށްޓަކައި 156 މީހެއްގެ މައްސަލަ ވަނީ އަނބުރާ ފޮނުވާލާފައެވެ.
އަހަރީ ރިޕޯޓްގައިވާ ގޮތުން މިދިޔަ އަހަރު ދައުވާކުރަން ފޮނުވި އެހެން އަހަރުތަކުގެ މައްސަލަތަކަށް ބަލާއިރު، ދައުވާކުރުމަށް ނިންމައި، ކޯޓުތަކަށް 744 މީހުންގެ މައްސަލަވަނީ ހުށަހަޅާފައެވެ. އަދި 38 މީހުންގެ މައްސަލަ ހެއްކާއި ޤަރީނާ ނެތިގެން އަނބުރާ ފޮނުވާލާފައިވާއިރު، 247 މީހުންގެ މައްސަލައަކީ އަލުން ހުށަހެޅުމަށްޓަކައި އަނބުރާ ފޮނުވާލާފައިވާ މައްސަލަތަކެވެ.