ކުރީގެ ރައީސް އަބްދުﷲ ޔާމީން ބަންދުގައި ބަހައްޓާފައިވާތާ ދެ ހަފްތާ ވެފައިވާއިރު އެމަނިކުފާނު މިނިވަން ކުރުމަށް އިދިކޮޅު ކޯލިޝަނުން ކުރާ މަސައްކަތަށް އެއްވެސް ކާމިޔާބީއެއް ލިބިފައިނުވާ ކަމަށް ޕީއެންސީގެ ވަގުތީ ރައީސް، ފޮނަދޫ ދާއިރާގެ މެމްބަރ އަބްދުއްރަހީމް އަބްދުﷲ ވިދާޅުވެއްޖެއެވެ.
ކޯލިޝަނުން މިއަދު ބޭއްވި ނޫސްވެރިންގެ ބައްދަލުވުމެއްގައި އަދުރޭ ވިދާޅުވީ ރައީސް ސޯލިހާ އެބޭފުޅުން ބައްދަލުކުރެއްވި ކަމަށާއި ނަމަވެސް އެކަން އިތުރަށް ބައްލަވާނެ ކަމަށް ވިދާޅުވުން ފިޔަވައި އެއްވެސް ކަމެއް ކޮށްފައިނުވާ ކަމަށް ވިދާޅުވިއެވެ. އަދި މިހާރު އޭނާ ގުޅުމުން ރައީސް ފޯން ވެސް ނުނަންގަވާ ކަމަށް ވިދާޅުވެ އަދުރޭ ވަނީ ޝަކުވާކޮށްފައެވެ.
އެބަ ބައްލަވަމޭ ކިޔާފައި އަޅުގަނޑަށް ކުރި މެސެޖްފިޔަވާ އިތުރު އެއްވެސް ކަމެއް ފާހަގަ ކުރެއްވިފައިނުވޭ. އަދި އޭގެ ފަހުން އަޅުގަނޑުގެ ކޯލަކަށް ޖަވާބެއް ވެސް ނުދެއްވާ"
އަދުރޭ ވަނީ ޔާމީނަށް މިސަރުކާރުން އަނިޔާ ކުރާ ކަމަށް ވެސް ތުހުމަތުކޮށްފައެވެ. މަނީ ލޯންޑަރިންގެ ތުހުމަތާއި ފުލުހުންނަށް ދޮގު މައުލޫމާތު ދިންކަމުގެ ތުހުމަތުގައި ދައުލަތުން ޔާމީނާ ދެކޮޅަށް އުފުލާފައިވާ ދައުވާއާ މެދު ގޮތެއް ނިމެންދެން ޖަލުގައި ބަންދުކުރުމަށް އެދި ކްރިމިނަލް ކޯޓަށް ހުށައެޅި މައްސަލަ ކޯޓުން ވަނީ ދައުލަތުގެ ހުށައެޅުމާ އެއްގޮތަށް ނިންމާފައެވެ.
އިދިކޮޅުން އެ މައްސަލަ ހައިކޯޓުގައި އިސްތިއުނާފް ކޮށްފައިވާއިރު އެމައްސަލަ އަދި ހައިކޯޓުން ފަށާފައެއް ނުވެއެވެ.