އުރީދޫން ހިއްސާ އަކަށް 3.22ރ. ބަހަން ނިންމައިފި

އުރީދޫން ހިއްސާ އަކަށް 3.22ރ. ބަހަން ނިންމައިފި އެވެ.

އުރީދޫ މޯލްޑިވްސް އަށް މިދިޔަ އަހަރު ލިބުނު ސާފު ފައިދާ އިން ހިއްސާއަކަށް 3.22ރ. ނިންމައިފައި ވަނީ ރޭ އުރީދޫން ދަރުބާރުގޭގައި ބޭއްވި އަހަރީ އާއްމު ޖަލްސާގައި އެވެ.

މި ޖަލްސާއަށް ކުންފުންޏަށ ލިބުނު ފައިދާގެ 88 ޕަސެންޓު، 3.22ރ ބަހަން ފާސްކުރީ ޖަލްސާއަށް ހާޒިރުވި 109 ހިއްސާދާރުންގެ އިއްތިފާގުންނެވެ.

ރޭ ވަނީ އެ ކުންފުނީގެ މިދިޔަ އަހަރު މާލީ ރިޕޯޓް އިއްވައިފައެވެ. ގަތަރުގެ އުރީދޫ ގްރޫޕުގެ، އުރީދޫ މޯލްޑިވްސްއިން ބޭއްވި އަހަރީ އާއްމު ޖަލްސާގައި ޗީފް އެގްޒެކެޓިވް އޮފިސަރު ނަޖީބު ހާން ވިދާޅުވީ މިދިޔަ އަހަރަކީ އެ ކުންފުނީގެ ތާރީހުގައި ގިނަ ކާމިޔާބީތަކެއް ލިބިގެން ދިޔަ އަހަރެއް ކަމަށެވެ.

ހާއްސަކޮށް "ޑިޖިޓަލް ރާއްޖެ" އަކަަށް ބަދަލު ކުރުމަށް އެ ކުންފުނިން ކަނޑައަޅާފައިވާ ތަސްވަރު ހާސިލް ކުރުމަށް މުހިންމު ފިޔަވަޅުތަކެއް އެޅިގެން ދިޔަކަން ނަޖީބު ފާހަގަ ކުރެއްވި އެވެ.

މިދިޔަ އަހަރު އާމްދަނީގެ ގޮތުގައި 1.9 ބިލިއަން ރުފިޔާ ލިބިފައިވާ ކަމަށާއި މީގެ އިތުރުން ސާފު ފައިދާވަނީ 544 މިލިއަން ރުފިޔާއަށް އިތުރުވެފައި ވާ ކަން ނަޖީބު ފާހަނގަ ކުރެއްވި އެވެ.

އުރީދޫން ރޭ ބޭއްވި އަހަރީ އާއްމު ޖަލްސާގައި ކުރިއަށް އޮތް އަހަރަށް ކުންފުނި އޮޑިޓް ކުރުމަށް ކުންފުންޏެއް ވެސް ވަނީ ހަމަޖައްސާފަ އެވެ.

އެގޮތުން ކުންފުނި އޮޑިޓް ކުރުމަށް ހަމަޖައްސާފައިވަނީ ކޭޕީއެމްޖީ އެވެ.

އުރީދޫ މޯލްޑިވްސް އޮޑިޓް ކުރަމުންދާާތާ ދެ އަހަރު ވެފައިވާ މި ކުންފުންޏަށް މަސައްކަތް ހަވާލުކުރީ 56،750 ޑޮލަރަށެވެ.