އިންޑިޔާގެ ނޫހަށް ޑިފެންސް މިނިސްޓަރ މާރިޔާދީދީ ދެއްވި އިންޓަވިއުއާ ގުޅިގެން އެއްވެސް ބޭފުޅަކަށް ހިތްޕުޅު ހަމަނުޖެހިވަޑައިގެންފައިވާނަމަ އެކަމަށް މައާފަށް އެދިވަޑައިގަންނަވާ ކަމަށް މިނިސްޓަރ މާރިޔާ އަހުމަދު ދީދީ ރައްޔިތުންގެ މަޖިލީހުގައި މައާފަށް އެދިވަޑައިގެންފިއެވެ.
މާރިޔާ އިންޑިޔާގެ ނޫހަކަށް ދެއްވި އިންޓަވިއުއަކާ ގުޅިގެން މިއަދު މަޖިލީހަށް ހާޒިރުކޮށް އެ އިންޓަވިއުގައި ދެއްކެވި ވާހަކައަށް ޖަވާބުދާރީވުމަށް މަޖިލީހުގެ ރައީސް ވަނީ ފުރުސަތު އަރުވާފައެވެ. އިންޓަވިއުގައި އިންޑިޔާއަށް ރާއްޖެ ހިފިދާނެ ކަމަށް މާރިޔާ ވިދާޅުވުމުން ޑިފެންސް މިނިސްޓަރު އެފަދަ ވާހަކައެއް ދެއްކެވުމުން އެކަމަނާއަށް ވަނީ ވަރަށް ބޮޑަށް ފާޑުކިޔުން އަމާޒުވެފައެވެ.
މާރިޔާ ވިދާޅުވީ އެ އިންޓަވިއުގައި 22 މިނެޓުވަންދެން ވާހަކަ ދެއްކެވި ކަމަށާއި، އެހެން ނަމަވެސް ހިތްޕުޅާ ހަމަނުޖެހިވަޑައިގެން އުޅުއްވާ ބޭފުޅުން ފާޙަގަކުރަނީ އެންމެ ފަސް ސިކުންތުގެ ވާހަކަކޮޅަކަށް ކަމަށެވެ. ހިތާމައަކީ ލައިވްކޮށް ރިކޯޑު ކުރެވޭ އެފަދަ އިންޓަވިއުތަކުގައި އަލުން ސުވާލު ކުރުމުގެ ފުރުސަތު ނުލިބޭތީ ކަމަށް މާރިޔާ ވިދާޅުވިއެވެ.
ނަމަވެސް އެއްގޮތަކަށް ވެސް ދިވެހި އަސްކަރިއްޔާއިން ނުވަތަ، ދިވެހި ރައްޔިތުން، ދިވެހި ސަރުކާރުން އިންޑިޔާއަށް ބިރުން އުޅޭކަށް ނުޖެހޭ ކަމަށާއި، އިންޑިޔާއަކީ ރާއްޖޭގެ އުތުރުން ރާއްޖެއަށް އޮތް އެންމެ ބޮޑު ބާރު ކަމަށް މާރިޔާ ވިދާޅުވިއެވެ.