ރައްޔިތުންގެ މަޖިލީހުގެ އޭދަފުށި ދާއިރާގެ މެމްބަރު އަހުމަދު ސަލީމް(ރެޑްވޭވް) އެބޭފުޅުންނަށް ވުރެ ނަޒާހަތްތެރި ބަޔަކު ނެތް ކަމަށް މަޖިލީހުގައި ވިދާޅުވެއްޖެއެވެ.
މިއަދު ކުރިއަށްދާ ރައްޔިތުންގެ މަޖިލީހުގެ ޖަލްސާގައި، ނުހައްގުން މުއްސަނދިވުން ހުއްޓުވުމަށް ހުށައަޅާފައިވާ ބިލަށް ވާހަކަ ދައްކަވަމުން ސަލީމް ވިދާޅުވީ ކޮންމެ ބަޔަކުވެސް މިފަދަ ބިލް ހުށައަޅައިގެން މަސައްކަތް ކުރަނީ ސިޔާސީ ގޮތުން އެހެން މީހުން ފިއްތާލުމަށް ކަމަށެވެ.
ކޮންމެ ބަޔަކުވެސް އެފަދަ ކަންކަން ކުރަނީ އެބޭފުޅުންނަކީ އެންމެ ނަޒާހަތްތެރި މީހުން ކަމަށް ދައުވާ ކުރަމުން ކަމަށާއި، އެހެން ނަމަވެސް ކަން ވަނީ އެހެން ނޫން ކަމަށް އޭނާ ވިދާޅުވިއެވެ.
ނަޒާހަތްތެރި ބަޔަކު ހޯދާނަމަ އެބޭފުޅުންނަށް ވުރެ ނަޒާހަތްތެރި ބަޔަކު ނުހޯދޭނެ ކަމަށް ސަލީމް ވިދާޅުވިއެވެ. އަދި އެމްޑީޕީ ކެންޑިޑޭޓުން މާލީ ބަޔާން ހުށައެޅުމުން އެކަމަށް ފާޑުވިދާޅުވެ ސަލީމް ވިދާޅުވީ އޭނާގެ މާލީ ބަޔާން މާލޭގެ އެކި އަވަށް ތަކުން ފެންނާނެ ކަމަށެވެ.
މަޝްހޫރު ރެޑްވޭވް ވިޔަފާރީގެ ވެރިޔާ ސަލީމް އިޝާރާތް ކުރެއްވީ އޭނާގެ ފިހާރަތަކާއި ވިޔަފާރިތަކަށް ކަމަށް ބެލެވެއެވެ.
އަދި އެވަރުން މާލީ ބަޔާން ފުދޭ ކަމަށާއި އިތުރު މާލީ ބަޔާނެއް ހުށައަޅަން ނުޖެހޭ ކަމަށް އޭނާ ވިދާޅުވިއެވެ. ނަމަވެސް ރައްޔިތުންގެ މަޖިލީހުގެ ގަވާއިދުގައި ހުރިހާ މެމްބަރުންވެސް މާލީ ބަޔާން ހުށައެޅުން ލާޒިމް ކުރެއެވެ. އެހެންނަމަވެސް އެ މައުލޫމާތުތަކަކީ ރައްޔިތުންނަށް ހާމަކުރާ މައުލޫމާތުތަކެއް ނޫނެވެ.