މަސްތުވާތަކެއްޗާއި އެކު 18 އަހަރުން ދަށުގެ ކުއްޖަކު ޅ. ކުރެންދޫއިން ހައްޔަރުކޮށްފި އެވެ.
ފުލުހުން ބުނީ މާލެ އާއި ކުރެންދޫއާއި ދެމެދު ދަތުރުކުރާ ދޯންޏަކުން ކުރެންދޫއަށް މަސްތުވާތަކެތި އެތެރެކުރަން އުޅޭކަމަށް ފުލުހުންގެ އިންޓެލިޖެންސަށް ލިބުނު މައުލޫމާތަކާއި ގުޅިގެން އެކުއްޖާ ހައްޔަރުކޮށްފައިވަނީ އިއްޔެ 06:30 ހާއިރު ކުރެންދޫގައި މަސައްކަތްކުރާ ފުލުހުން ގުޅިގެން ހިންގި އޮޕަރޭޝަނެއްގައި ކަމަށެވެ.
ފުލުހުން ބުނީ އެދޯނި ކުރެންދުއަށް ގާތްކުރި ވަގުތު އެދޯނިން ފައިބައިގެން ދިޔަ މިކުއްޖާ މަގުމަތިން ހުއްޓުވައި ބަލައިފާސް ކުރުމުން މަސްތުވާތަކެތި ކަމަށް ޝައްކުކުރެވޭ އެއްޗެއް ހުރި 19 ރަބަރު ޕެކެޓު އެކުއްޖާއަތުން ފެނިފައިވާ ކަމަށެވެ.
ކއްޖާގެ ބަންދާއިމެދު ގޮތެއް ނިންމުމަށް ކުރެންދޫ މެޖިސްޓްރޭޓް ކޯޓަށް ހާޒިރުކުރުމުން، މިނިސްޓްރީ އޮފް ހޯމް އެފެއާޒުން ކަނޑައަޅާ ތަނެއްގައި ބަންދުގައި ބެހެއްޓުމަށް 12 ދުވަހުގެ މުއްދަތެއް ވަނީ ދީފައެވެ.
މި މައްސަލަ ކުރެންދޫ ޕޮލިސް ސްޓޭޝަނުން އިތުރަށް ތަހުގީގު ކުރަމުން ދާ ކަމަށް ފުލުހުން ވަނީ ބުނެފައެވެ.