އިނގިރޭސި އިލެކްޓްރޯނިކް މިއުޒިކް ބޭންޑެއް ކަމުގައިވާ "ދަ ޕްރާޑަޖީ"ގެ ތަރި، ކީތު ފްލިންޓް އުމުރުން 49 އަހަރުގައި މަރުވެއްޖެ އެވެ.
އެ ބޭންޑްގެ އެންމެ މަޝްހޫރު ދެ ލަވަ ކަމުގައިވާ "ބްރީތު" އާއި "ފަޔަރސްޓާޓަރ" ކިޔައިދީފައިވާ ކީތު މަރުވެފައި އޮތްވާ ފެނުނީ މިއަދު ހެނދުނު، އެސެކްސްގެ ޑަންމޯގައި ހުންނަ އޭނާގެ ގެއިންނެވެ.
އަންނަ މެއި މަހު އެމެރިކާގައި ޓުއާކުރުމަށް ހަމަޖެހިފައިވާ އެ ބޭންޑުން ވަނީ ކީތު މަރުވި ޚަބަރު ކަށަވަރުކޮށްދީފަ އެވެ.
"ދަ ޕްރާޑަޖީ" އަކީ 1980ގެ އަހަރުތަކުގެ ފަހުކޮޅު އެންމެ މަޝްހޫރުވެގެންދިޔަ އެސިޑް ހައުސް މިއުޒިކްގެ އެއް ބޭންޑެވެ.
އެ ބޭންޑްގެ ދެވަނަ އަލްބަމް ކަމުގައިވާ "މިއުޒިކް ފޯ ދަ ޖިލްޓެޑް ޖެނެރޭޝަން"، މާކިއުރީ މިއުޒިކް ޕްރައިޒް އަށް ނޯމިނޭޓްވެފައިވާއިރު، ބޭންޑަށް ބައިނަލްއަޤްވާމީ ގޮތުން މަޤްބޫލްކަން ހޯދީ "ފަޔަރސްޓާޓަރ" ލަވަ ރިލީޒްކުރުމާއެކު އެވެ. 1996 ވަނަ އަހަރު އިނގިރޭސިވިލާތުގައި އެކަނިވެސް އެ ލަވައިގެ 600،000 ކޮޕީ ވިކިފައެވެ.
ފްލިންޓް މަރުވި ސަބަބެއް އަދި ނޭނގެއެވެ.