ދިވެހި ރާއްޖޭގެ ރައީސްކަން ކޮށްފައިތިބި ބޭފުޅުންނަށް ދޭ އިނާޔަތްތައް ގައުމުގެ މާލިއްޔަތާ ނުބައްދަލު ކަމަށް ހިތަދޫ ދެކުނު ދާއިރާގެ މެމްބަރު އަލީ ނިޒާރު ވިދާޅުވެއްޖެއެވެ.
ގާނޫނު އަސާސީގައި ބަޔާންވެފައިވާ ގޮތުން އެއް ދައުރު ފުރިހަމަ ކޮށްފައިވާ ރައީސަކަށް މަހަކު 50،000 ރުފިޔާ ލިބެން ޖެހެއެވެ. އަދި އެބޭފުޅެއްގެ އަނބިކަނބަލުން މަރުވެއްޖަނަމަ ނުވަތަ އެހެން ކައިވެންޏެއް ނުކުރާހާ ހިނދަކު މަހަކު 50،000 ރުފިޔާ ލިބެން ޖެހެއެވެ.
އެހެނިހެން އިނާޔަތްތަކާ އެކު މަހަކު މައްޗަށް 275،000 ރުފިޔާ ދިނުމަކީ ގައުމުގެ މާލީ ހާލަތާ އެކަށީގެންވާ އަދަދެއް ނޫން ކަމަށް ނިޒާރު ވިދާޅުވެފައިވާއިރު، މިހާރު އެ ފައިސާ ދޭން ޖެހޭ ފަސް ބޭފުޅުން ތިބިކަން އޭނާ ފާހަގަކުރެއްވިއެވެ.