ސަރުކާރުގެ ފަރާތުން ރައްޔިތުންގެ މަޖިލީހަށް ހުށައަޅާ ބިލްތަކަށް އެއްބާރުލުން ދެއްވާނެ ކަމަށް ފޭދޫ ދާއިރާގެ މެމްބަރު އިބްރާހިމް ދީދީ(އައިބީ) ވިދާޅުވެއްޖެއެވެ.
މިއަދުގެ ރައްޔިތުންގެ މަޖިލީހުގެ ޖަލްސާގައި ވާހަކަ ދައްކަވަމުން އައިބީ ވިދާޅުވީ ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހްގެ ވެރިކަމަށް އެއްބާރުލުން ދޭނެ ކަމަށާއި ބިލްތައް ފާސްނުކޮށް ސަރުކާރު ހިންގަން ދަތިކުރަން މަސައްކަތް ނުކުރައްވާނެ ކަމަށެވެ.
ނަމަވެސް އަވަސް އަރުވާލާފައި ބިލްތައް ނިންމުމަށް ތާއީދު ނުކުރައްވާ ކަމަށް އައިބީ ވިދާޅުވިއެވެ. ބިލުތަކަށް ވޯޓަށް އެހުމުގެ ކުރިން ރަނގަޅަށް ދިރާސާކޮށް މަޝްވަރާ ކުރެވެން ޖެހޭނެ ކަމަށް އައިބީ ފާހަގަކުރެއްވިއެވެ.
ނިމިގެން ދިޔަ ސަރުކާރުން ފާސްކުރި ބޮޑެތި ބިލްތައް ނިންމުމުގައި އިސް ދައުރެއް އަދާ ކުރެއްވި އައިބީ ވަނީ ޔާމީންގެ ވެރިކަން ދިފާއުކުރަން ވަރަށް ބޮޑަށް މަސައްކަތް ކުރައްވާފައެވެ.
ނަމަވެސް ކުރިއަށް އޮތް މަޖިލިސް އިންތިޚާބުގައި އައިބީ ވަނީ ޕީޕީއެމްގެ ޓިކެޓު ދިނުމުން ޓިކެޓު ދޫކޮށްލައްވައި އަމިއްލަ ގޮތުން ވާދަކުރުމަށް ނިންމާފައެވެ. އައިބީ ވިދާޅުވީ ދާއިރާއަށް މިވަގުތު އެންމެ ލާބަ ބޮޑު ކަމަށް ދެކެނީ އަމިއްލަ ގޮތުން ވާދަކޮށްގެން ކަމަށެވެ.