ފުލުހުންނަކީ ރައްޔިތުންނާ ގާތުން މަސައްކަތް ކުރަން ޖެހޭ ބަޔެއް ކަމަށާއި ރައްޔިތުންނާ ފުލުހުން ދުރުވެގަނެގެން ފުލުހުންގެ މުއައްސަސާ ހަރުދަނާ ނުކުރެވޭނެ ކަމަށް ހޯމް މިނިސްޓަރ ޝެއިޚް އިމްރާން އަބްދުﷲ ވިދާޅުވެއްޖެއެވެ.
ޕޮލިސް ރިފޯމް ސިމްޕޯސިއަމް ފެށުމުގެ ގޮތުން މިއަދު ބޭއްވި ރަސްމިއްޔާތުގައި ވާހަކަ ދައްކަވަމުން ޝެއިޚް އިމްރާން ވިދާޅުވީ ރައްޔިތުންގެ ސަލާމަތާއި ރައްކާތެރިކަން ބެލެހެއްޓުމަކީ ފުލުހުންގެ އެންމެ މަތީ ވާޖިބު ކަމަށެވެ. އެ ވާޖިބު އަދާ ކުރެވޭނީ ފުލުހުންގެ މުއައްސަސާ އަކީ ރައްޔިތުންނާ ގުޅިގެން މަސައްކަތް ކުރާ މުއައްސަސާއަކަށް ވެގެން ކަމަށް މިނިސްޓަރުގެ ވާހަކަފުޅުގައި ފާހަގަކުރެއްވިއެވެ.
"މި މުއައްސަސާއާ ދިވެހި ރައްޔިތުންނާ އޮތް ގުޅުމަކީ މައި މީހާ އާއި ދަރިޔާއާ ދެމެދު އޮންނަ ގުޅުން، ދިވެހި ރައްޔިތުންނަކީ މިމުއައްސަސާގެ ހަގީގީ މައި މީހާ، ފުލުހުންނަކީ ރައްޔިތުންނާއި ދުރު، ރައްޔިތުންނާ ވަކި ރައްޔިތުންގެ މައްޗަށް ބާރުވެރިވާ ބައެއްގެ ގޮތުގައި ދެކިގެން ނޫން މަސައްކަތް ކުރަމުން މިދަނީ، މި މަސައްކަތް ކުރަމުންދަނީ ރައްޔިތުންނާއި އެކުގައި، ރައްޔިތުންނާއި ގާތުން ރައްޔިތުންނަށް ހިދުމަތްދޭ ބައެއްގެ ގޮތުގައި މަސައްކަތް ކުރުމަށްޓަކައި،"
ރައީސް ސޯލިހްގެ ސަރުކާރުގައި ފުލުހުންގެ މުއައްސަސާއަކީ ރައްޔިތުންގެ އިހުތިރާމާއި ލޯބި އަދި އިތުބާރު ލިބިފައިވާ މުއައްސަސާއަކަށް ހެދުމަށް މަސައްކަތް ކުރެވޭނެ ކަމަށް އިމްރާން ވިދާޅުވިއެވެ. އަދި ކުރިއަށް އޮތް ފަސް އަހަރު ދުވަހު ފުލުހުން ރައްޔިތުންނާ އެކު މަސައްކަތް ކުރުމުގައި ކުރިއަށް ދިއުމަށް ކުރަން ޖެހޭ ކަންތައް ކުރެވޭނެ ކަމަށް ވެސް އިމްރާން ވިދާޅުވެފައިވެއެވެ.
ރައީސް ސޯލިހްގެ ވެރިކަމުގައި ފުލުހުން ވަނީ ނެއިބަހުޑް ޕްރޮޓެކްޓް ވޮޗް ގެ ނަމުގައި މާލޭގެ އަވަށްތައް އަމާން ކުރުމަށް މަސައްކަތް ފަށާފައެވެ. އެގޮތުން މާލެތެރެ ޕެޓްރޯލް ކުރުމާއި ކޮންމެ އަވަށަކަށް އެމަޖެންސީގައި ގުޅޭނެ ނަމްބަރެއް ތައާރަފް ކުރުން ހިމެނެއެވެ.