ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހް، އެމަނިކުފާނުގެ ޕާޓީ، އެމްޑީޕީގެ މަސައްކަތްތަކުގައި އެކި ރަށް ރަށަށް ކުރައްވާ ދަތުރުފުޅުތަކަށް ސަރުކާރުން ޚަރަދު ނުކުރާނެ ކަމަށާއި އެކަންކަމަށް ޚަރަދު ކުރާނީ އެމްޑީޕީން ކަމަށް އެޕާޓީން ބުނެފިއެވެ.
އެމްޑީޕީގެ ޑެޕިއުޓީ ސެކެޓްރީ ޖެނެރަލް އަދި މަޖިލިސް އިންތިޚާބުގެ ސްޕޯކްސްޕާސަން އަފްޝަން ލަތީފް މިއަދު ނޫސްވެރިންނަށް މައުލޫމާތު ދެއްވަމުން ވިދާޅުވީ ރައީސްގެ ކެމްޕޭނު ދަތުރުތަކުގެ ހުރިހާ ޚަރަދެއް އެމްޑީޕީން ބަލަހައްޓަވާނެ ކަމަށެވެ.
އެގޮތުން ދަތުރުފަތުރުގެ ޚަރަދުގެ އިތުރުން ކެއުމާއި ހުރުމުގެ ޚަރަދުވެސް އެމްޑީޕީން ކުރާނެ ކަމަށް އަފްޝަން ވިދާޅުވިއެވެ.
އެމްޑީޕީގެ އެޖެންޑާ 19 ގެ އައްޑޫ ސިޔާސަތު ލޯންޗުކުރުމަށް ރައީސް ސޯލިހް މިއަންނަ ހުކުރު ދުވަހު އައްޑޫ ސިޓީއަށް ދަތުރުފުޅެއް ކުރެއްވުމަށް ވަނީ ހަމަޖެހިފައެވެ. އެ ދަތުރުފުޅުގައި އެމަނިކުފާނާ އެކު ކުރީގެ ރައީސް ނަޝީދުވެސް ބައިވެރިވާނެ ކަމަށް އެމްޑީޕީން ބުނެއެވެ.