2020 ވަނަ އަހަރު އެމެރިކާގައި ބާއްވާ ރިޔާސީ އިންތިޚާބުގައި ވާދަނުކުރައްވާނެ ކަމަށް ހިލަރީ ކްލިންޓަން ވިދާޅުވެއްޖެ އެވެ.
ނިއު ޔޯކްގެ "ނިއުސް 12" ޓީވީ ޗެނަލަށް ދެއްވި އިންޓަވިއުއެއްގައި ކްލިންޓަން ވިދާޅުވީ އިންތިޚާބުގައި ވާދަނުކުރެއްވި ނަމަވެސް، ޤަބޫލުކުރައްވާ ކަންތައްތަކާއި ގުޅޭގޮތުން ވާހަކަދައްކަވައި، އެކަންތައްތަކަށް މަސައްކަތްކުރެއްވުން ކުރިއަށްގެންދަވާނެ ކަމަށެވެ.
2016 ވަނަ އަހަރު ބޭއްވި އެމެރިކާގެ ރިޔާސީ އިންތިޚާބުގައި ކްލިންޓަން ވާދަކުރެއްވީ ޑިމޮކްރެޓިކް ކެންޑިޑޭޓެއްގެ ގޮތުގައެވެ. ކްލިންޓަން އަށް އިންތިޚާބު ކާމިޔާބުވާނެ ކަމަށް ގިނަ ބަޔަކު ޤަބޫލުކުރިނަމަވެސް، އެ ފަހަރުގެ އިންތިޚާބު ޑޯނަލްޑް ޓްރަމްޕް ކާމިޔާބުކުރެއްވުން ވެގެންދިޔައީ ލިބުނު ބޮޑު ސިހުމަކަށެވެ.
"މުސްތަޤްބަލުގައި އެއްވެސް ސިޔާސީ މަޤާމަކަށް ކުރިމަތިލައްވާނެތޯ ސުވާލުކުރުމުން ކްލިންޓަން ވިދާޅުވީ އެފަދަ އެއްވެސް މަޤާމަކަށް ކުރިއަށް އޮތް ތަނުގައި ކުރިމަތިލައްވަން ޚިޔާލެއް ނުކުރައްވާ ކަމަށެވެ.
މިއީ 2020 ވަނަ އަހަރު އަނެއްކާވެސް ޓްރަމްޕް އާއި ވާދަކުރައްވައި ކްލިންޓަން ކާމިޔާބުކުރައްވާނެ ކަމަށް މީޑިއާގައި ފެތުރުނު ވާހަކަތައް ރަސްމީ ސިފައެއްގައި ކްލިންޓަން ދޮގުކުރެއްވި ފުރަތަމަ ފަހަރެވެ.
ކްލިންޓަން ވިދާޅުވީ އަންނަ އަހަރުގެ އިންތިޚާބުގައި ވާދަކުރައްވާ ބައެއް ޑިމޮކްރެޓިކް ކެންޑިޑޭޓުންނާއި ބައްދަލުކުރައްވާފައިވާ ކަމަށާއި، އެއްވެސް ކަމެއްގެ ނާޖާއިޒް ފައިދާ ނުނެގުމަށް ކެންޑިޑޭޓުންނަށް ނަސޭހަތްތެރިވެވަޑައިގެންފައިވާ ކަމަށެވެ.
ކްލިންޓަން އަކީ އެމެރިކާގެ ތާރީޚުގައި ވެސް އެޤައުމުގެ މައި ސިޔާސީ ޕާޓީއަކުން ނޯމިނޭޓްކުރި ފުރަތަމަ އަހްނެން ރިޔާސީ ކެންޑިޑޭޓެވެ.