ސްޓްރޯކެއް ޖެހުނުތާ ހަފްތާއެއް ނުވަނީސް އެކްޓަރު ލޫކް ޕެރީ މަރުވެއްޖެ އެވެ.
އުމުރުން 52 އަހަރުގެ ޕެރީ މަރުވެފައި ވަނީ ކެލިފޯނިއާގައި އޭނާގެ އާއިލާ އާއި ރަހުމަތްތެރިން ކައިރީގައި ކަމަށް އޭނާގެ ޕަބްލިސިސްޓް ބުނެއެވެ.
ޕެރީ އެންމެ ފުރަތަމަ މަޝްހޫރުވެފައި ވަނީ ޓީވީ ޝޯއެއް ކަމުގައިވާ ބެވަލީ ހިލްސް، 90210 އިންނެވެ. މީގެ އިތުރުން މަރުވިއިރު އޭނާ ދިޔައީ ސީޑަބްލިއުގެ ޝޯ "ރިވާޑޭލް"ގައި ފްރެޑް އެންޑްރޫސްގެ ރޯލް އަދާކުރަމުންނެވެ.
ލޮސް އެންޖެލިސްގެ ޝާމަން އޯކްސްގައި ހުންނަ ޕެރީގެ ގެއަށް ޕެރަމެޑިކްސް އައި ކަމަށް މިދިޔަ ބުދަ ދުވަހު އެމެރިކާގެ މީޑިއާ އިން ވަނީ ރިޕޯޓްކޮށްފަ އެވެ.
ޕެރީ މަރުވިއިރު އޭނާ ކައިރީގައި އޭނާގެ ދެކުދިން ކަމުގައިވާ ޖެކް އާއި ސޯފީ، ލޯބިވެރިޔާ ވެންޑީ މެޑިސަން، ކުރީގެ އަނބިމީހާ މިނީ ޝާޕް، މަންމަ އޭން ބެނެޓް، ބޭބެ ޓޮމް ޕެރީ އާއި ކޮއްކޮ އޭމީ ކޯޑަރ ތިބި ކަމަށް ޕެރީގެ ޕަބްލިސިސްޓް އާނޯލްޑް ރޮބިންސަން ނެރުނު ބަޔާނެއްގައި ބުނެފައި ވެއެވެ.
އަދި ހިތާމައިގެ މި ދަނޑިވަޅުގައި ދުނިޔޭގެ އެކި ހިސާބުތަކުން ލޫކް އަށް ލިބެމުންދާ ހިތްވަރާއި ހެޔޮއެދުންތަކަށް އާއިލާއިން ޝުކުރުވެރިވާ ކަމަށް އެ ބަޔާނުގައި ރޮބިންސަން ބުނެފައި ވެއެވެ.
މި ދަނޑިވަޅުގައި ޕެރީގެ މަރާއި ގުޅޭ އިތުރު އެއްވެސް ތަފްސީލެއް އާއިލާއިން ހާމަކޮށްފައެއް ނުވެއެވެ.
ޕެރީގެ މަރާއި ގުޅިގެން "ރިވާޑޭލް"ގެ ޕްރޮޑަކްޝަން ހުއްޓާލާފައިވާ ކަމަށް އެމެރިކާގެ މީޑިއާ ރިޕޯޓްތައް ބުނެއެވެ.
އެ ސީރީސްގެ އެގްޒެކެޓިވް ޕްރޮޑިއުސަރުން ކަމުގައިވާ ޑަބްލިއުބީޓީވީ އާއި ސީޑަބްލިއު ނެޓްވޯކް އިން ނެރުނު ބަޔާނެއްގައި ބުނެފައި ވަނީ ޕެރީ އަކީ ރިވާޑޭލް އާއި ވޯނާ ބްރޯސް އަދި ސީޑަބްލިއު އާއިލާގެ ލޮބުވެތި މެމްބަރެއް ކަމަށެވެ.
ޕެރީ ވަނީ ޓީވީ ޝޯ "އޮޒީ" އާއި "ބަފީ ދަ ވެމްޕަޔަރ ސްލޭޔަރ" އާއި "8 ސެކަންޑްސް" އަދި "ދަ ފިފްތު އެލަމެންޓް"ފަދަ ފިލްމްތަކުގައި ވެސް އެކްޓްކޮށްފަ އެވެ.