ދިވެހިރާއްޖެއިން ސިންގަޕޫރަށް ކަނޑައަޅުއްވާފައިވާ ސަފީރު ޑރ. ޢަބްދުﷲ މައުސޫމް، އެމަނިކުފާނުގެ ސަފީރުކަމުގެ ފަތްކޮޅު ސިންގަޕޫރުގެ ރައީސާ ހަރ އެކްސެލެންސީ މެޑަމް ހަލީމާ ޔަގޫބްއަށް މިއަދު އަރުވައިފިއެވެ.
އެމަނިކުފާނުގެ މަޤާމުގެ ފަތްކޮޅު ސިންގަޕޫރުގެ ރައީސާ އަށް އަރުވާފައިވަނީ، އެކަމަށްޓަކައި މިއަދު ހެނދުނު ސިންގަޕޫރުގެ ރައީސާގެ ރަސްމީ ގެކޮޅު "އިސްތާނާ" ގައި ބޭއްވެވި ޚާއްސަ ރަސްމިއްޔާތުގައެވެ.
މި ރަސްމިއްޔާތަށްފަހު ސަފީރާއި ދެއްކެވި ވާހަކަފުޅުގައި ސިންގަޕޫރުގެ ރައީސާ ވަނީ ސަފީރަށް ތަހުނިޔާ ދަންނަވައި ދެޤައުމުގެ ދެމެދުގައި އުފެދިފައިވާ ޒަމާންވީ ރަޙްމަތްތެރިކަމުގެ ގުޅުން އިތުރަށް ބަދަހިކުރުމަށް މަސައްކަތްކުރައްވާނެކަމަށް އުއްމީދު ކުރައްވާ ކަމުގައި ވިދާޅުވެފައެވެ.
އަދި ޑރ. މައުސޫމް ރައީސް އިބްރާހިމް މުޙައްމަދު ސޯލިހުގެ ފަރާތްޕުޅުން ހެޔޮއެދުމާއި ތަޙުނިޔާ އަރިސްކުރައްވައި، ދެޤައުމުގެ ދެމެދުގައި އުފެދިފައިވާ ޒަމާންވީ ރަޙްމަތްތެރި ގުޅުން އިތުރަށް ބަދަހިކުރުމަށް އެމަނިކުފާނު މަސައްކަތްކުރައްވާނެކަމުގެ ޔަޤީންކަން ވަނީ ދެއްވާފައެވެ.
މި ރަސްމިއްޔާތުގައި ޑރ. މައުސޫމްގެ އަރިހުގައި އެމަނިކުފާނުގެ އަނބިކަނބަލުން އަލްފާޟިލާ ޒީނާޒް ފަހުމީ، ސިންގަޕޫރުގައި ހުންނަ ދިވެހިރާއްޖޭގެ އެމްބަސީގެ ޑެޕިޔުޓީ އެމްބެސެޑަރ އަލްފާޟިލާ އީމާން ޙުސައިން އަދި ސެކަންޑް ސެކްރެޓަރީ އަލްފާޟިލާ އާމިނަތު ގުރައިޝާ ބައިވެރިވެވަޑައިގެންނެވި އެވެ.
ޑރ. މައުސޫމް ސިންގަޕޫރުގައި ހުންނަ ދިވެހިރާއްޖޭގެ ސަފީރުކަމަށް އައްްޔަނުކުރައްވާފައިވަނީ ނިމިގެންދިޔަ ފެބްރުއަރީ މަހުގެ 18 ވަނަ ދުވަހު އެވެ.