"ގޭމް އޮފް ތްރޯންސް"ގެ ފަހު ސީޒަންގެ ރަސްމީ ޓްރެއިލާ އެޗްބީއޯ އިން ނެރެފި އެވެ.
ފާއިތުވި މަސްތަކުގައި މި ސީޒަންގެ ގިނަ ޓީޒާތަކެއް ދައްކާލާފައިވާއިރު، ފައިނަލް ޓްރެއިލާ ބަލާލަން ފޭނުން ތިބީ ކެތްމަދުވެފަ އެވެ.
"ގޭމް އޮފް ތްރޯންސް"ގެ ހަތްވަނަ ސީޒަނަށްފަހު، ސީޒަން 08 އަށް ފޭނުން އިންތިޒާރުކުރަމުން އަންނަތާ މިވީ ގާތްގަނޑަކަށް ދެ އަހަރު ދުވަހެވެ.
މިރޭ ނެރުނު ޓްރެއިލާއިން ފެނިގެންދަނީ ޓީވީގެ ތާރީޚުގައި ވެސް ކުޅެފައިވާ އެންމެ ވަރުގަދަ އެއް ހަނގުރާމައިގެ އުސްއަލިތަކެވެ. ފަހު ސީޒަންގެ މުޅި އެއް އެޕިސޯޑް އެކީ އެ ހަނގުރާމައަށް ޚާއްސަވާނެ ކަމަށް މީޑިއާ ރިޕޯޓްތައް ބުނެއެވެ.
މި ސީޒަންގައި ހިމެނޭނީ އެންމެ ހަ އެޕިސޯޑް ކަމުގައިވާއިރު، ފޭނުންގެ ގިނަ ސުވާލުތަކަށް އަދިވެސް ޖަވާބެއް ލިބިފައެއް ނުވެއެވެ. ނަމަވެސް އަންނަ މަހު ޕްރިމިއަރ ކުރާ މި ސީޒަން ނިމިގެންދާއިރު، އެންމެ ފަހުން 'ތްރޯން' ލިބޭނީ ކާކަށްކަންވެސް އެނިގެންދާނެ އެވެ.
"ގޭމް އޮފް ތްރޯންސް" ސީޒަން 08 ޕްރިމިއަރ ކުރާނީ އަންނަ އޭޕްރީލް މަހުގެ 14 ވަނަ ދުވަހު އެވެ.