ނިލަންދޫ ދާއިރާގެ މެމްބަރު އަބްދުﷲ ޚަލީލްގެ އާއިލާގެ 12 ބޭފުޅަކަށް ސަރުކާރުގެ ބޯހިޔާވަހިކަމުގެ ސިޔާސަތުގެ ދަށުން ފްލެޓު ލިބިފައިވާތީ އެކަމާ ގުޅިގެން ޚަލީލަށް އަމާޒުވި ފާޑުކިޔުންތަކަށް އޭނާ ރައްދު ދެއްވައިފިއެވެ.
ޚަލީލް ވަނީ އެވާހަކަތަކަށް ރައްދު ދެއްވައި ނޫސް ބަޔާނެއް ނެރެ، ފިތުނަ އުފައްދަން މަސައްކަތް ނުކުރުމަށް ގޮވާލާފައެވެ. އަދި އޭނާގެ އާއިލާ ބޭފުޅުންނަށް ފްލެޓު ލިބުނީ އޭނާގެ ނުފޫޒެއް ނެތި ކަމަށާއި އެއީ އެބޭފުޅުންނަށް ހައްގު ފްލެޓު ކަމަށް ބަޔާނުގައި ބުނެފައިވެއެވެ.
ޚަލީލް ވިދާޅުވީ އޭނާގެ އާއިލީ މެމްބަރުންގެ ތެރެއިން ފްލެޓު ލިބުނު ފަރާތްތަކުގެ އަސްލު އަދަދަކީ 37 ކަމަށެވެ. އެއީ ބައެއް ނޫސްތަކަށް އޭނާގެ ދާއިރާގެ މީހަކު ދިން މައުލޫމާތުގައި ހިމެނޭ އަދަދުގެ ތިން ގުނަ އަދަދެއް ކަމަށްވެސް ވިދާޅުވިއެވެ.
އަދި އޭނާގެ އާއިލާގެ ބޭފުޅުންނަށް ފްލެޓު ލިބުމަކީ ރައްޔިތުންގެ މަޖިލީހުގެ ގޮނޑިއެއް ފުރަން ޚަލީލް އިންނެވީތީ ލިބުނު ފްލެޓުތަކެއް ނޫން ކަމަށް ތަކުރާރުކުރެއްވިއެވެ. ރައްޔިތުންގެ މަޖިލީހުގެ ގޮނޑިއެއް ފުރަން ޚަލީލް ހުންނެވުމަކީ އޭނާގެ އާއިލީ ބޭފުޅުންގެ ތެރެއިން ފްލެޓު ހައްގު ބޭފުޅުންނަށް ފްލެޓު މަހްރޫމް ވާން ޖެހޭ ސަބަބެއް ކަމުގައި ނުދެކޭ ކަމަށް ވެސް ބަޔާނުގައި ޚަލީލް ފާހަގަކުރެއްވިއެވެ.
އާއިލީ ބޭފުޅުންނަށް ފްލެޓު ލިބިފައިވަނީ ޑޮކްޓަރުންނާއި ނަރުހުންނާއި ޓީޗަރުންނާއި އަލަތު ކައިވެން ކޮށްގެންނާއި ސިފައިންގެ މީހުން ފަދަ ކެޓެގަރީތަކުން ޕޮއިންޓު ލިބިގެން ކަމަށާއި އެއީ އެއްވެސް ހާލަތެއްގައި އޭނާގެ ނުފޫޒަކުން ހޯދާދީފައިވާ ފްލެޓުތަކެއް ނޫން ކަމަށް ވިދާޅުވެ ޚަލީލް ވަނީ ފިތުނަ އުފެއްދުމާއި ނަން ކިލަނބުކުރުމަށް މަސައްކަތް ނުކުރުމަށް އެދިވަޑައިގެންފައެވެ.
ނޫސްބަޔާނުގައި ޚަލީލްގެ އާއިލީ ބޭފުޅުންނަށް ފްލެޓު ހައްގު ކަމަށް ވިދާޅުވި ނަމަވެސް ގިނަ ބޭފުޅުންނަށް 70 ޕޮއިންޓުވެސް ލިބިފައިނުވާ ކަން ފާހަގަކޮށްލެވެއެވެ. ފްލެޓުތަކަށް ޕޮއިންޓު ދިން އިރު 90 އިން މަތިން ޕޮއިންޓު ލިބިފައިވާ ފަރާތްތަކަށް ފްލެޓު ނުލިބި އެބަތިއްބެވެ.