މަޝްހޫރު ޕްރޮޑިއުސަރ ކަރަން ޖޯހަރު އޭނާގެ ކުރިޔަށް އޮތް ފިލްމު "ކަލަންކް" ގެ ފުރަތަމަ ފެނިލުމުގެ ފޮޓޯއެއް ސޯޝަލް މީޑިއާގައި އާންމުންނާއި ހިއްސާ ކޮށްފިއެވެ.
އާލިޔާ ބަޓް އަދި ވަރޫން ދަވަންގެ މި ފިލްމު ދާދި އަވަހަށް ބެލުންތެރިންނާއި ހަމަޔަށް ގެނެސްދެވޭނެ ކަމަށް ކަރަން ވަނީ ބުނެފައެވެ.
މި ފިލްމަކީ ކަރަންގެ ހިތުގައި މީގެ 15 އަހަރު ކުރިން އުފަން ކުރުވި ފިލްމެއް ކަމަށާއި މިއީ އޭނާގެ ބައްޕައާއިއެކު އެ ފިލްމަކަށް މަސައްކަތް ކުރެވުނު އެންމެ ފަހުގެ ފިލްމު ކަމަށް ވެސް އޭނާ ވަނީ ބުނެފައެވެ. ބައްޕަ ދުނިޔެ ދޫކުރުމަށްފަހު ފިލްމާއިގެން ކުރިޔަށް ދާނެ ހިތްވަރު ނެތުމުން އެކަން މަޑުޖައްސާލާފައި އޮތް ނަމަވެސް މިހާރު ބައްޕަގެ ހުވަފެން ހަގީގަތަކަށް ހަދަނީ ކަމަށް އޭނާ ވަނީ ބުނެފައެވެ.
މި ފިލްމުގައި ވަރޫން އަދި އާލިޔާގެ އިތުން މާދުރީ އާއި ސަންޖޭ ދަތު އަދި ސޮނާކްޝީ ސިންހާ ފެނިގެންދާނެއެވެ. ނިމުމެއްނުވާ ލޯބީގެ ހާދިސާއެއްގެ މައްޗަށް ބިނާކޮށް ހަދާ މި ފިލްމަކީ ގިނަ ސަޕޯޓަރުންނަށް ކަމުދާނެ ބަލާހިތްވާ ފިލްމަކަށް ވެގެންދާނެ ކަމަށް ކަރަން ޖޯހަރު ޔަގީން ކުރެއެވެ. މި ފިލްމު ރިލީޒް ކުރެވޭނެ ތާރީޚެއް އަދި ހާމަކޮށްފައެއް ނުވެއެވެ.