ފިލްމް " ކަރަން އަރުޖުން" އަދި "ހަމް ތުމާރޭ ހޭ ސަނަމް" ފަދަ ފިލްމުތަކުން އެކުގައި ފެނި ގިނަ ބައެއްގެ ތާއީދު ހޯދާފައިވާ ސަލްމާން ޚާން އަދި ޝާހްރުކްޚާން އެކުގައި ފިލްމަކުން ފެންނާނެ ކަމުގެ އުއްމީދު އާވެފައިވާ ކަމަށް އިންޑިއާގެ ބައެއް ނޫސްތަކުން ރިޕޯޓް ކޮށްފިއެވެ.
ދާދި ފަހުން ޝާހްރުކްޚާންގެ ފިލްމް"ޒީރޯ"ގައި ލަވައަކުން މި ދެތަރިން ވަނީ ފައިހަމަކުރާ މަންޒަރު ފެނިގެންގޮސްފައެވެ. އެއަށްފަހު ސަންޖޭ ލީލާ ބަންސާލީގެ ކުރިޔަށް އޮތް ފިލްމުގައި ސަލްމާން އާއެކު ޝާހްއަށް ރަނގަޅު ރޯލެއް ދޭނެ ކަމަށް ގިނަ ފަރާތްތަކަކުން ދަނީ ބުނަމުންނެވެ.
ސަންޖޭގެ މި ފިލްމުގެ ލީޑް ރޯލަށް މާކުރިންވެސް ވަނީ ސަލްމާން ހަމަޖައްސާފައެވެ. އަންހެން ލީޑް ރޯލުން ފެންނާނެ ތަރިއެއް އަދި ހާމަކޮށްފައެއް ނުވެއެވެ.
މި ދެތަރިން މަސައްކަތް ކުރާ މަންޒަރު ފެނުމަކީ ސަޕޯޓަރުންނަށް ވަރަށް ކަމުދާނެ މަންޒަރަކަށް ވެގެންދާނެއެވެ. އަދި ގިނަ ބަޔަކަށް ސަޕްރައިޒް ވެގެންދާނެ ކަމެއް ވެސްމެއެވެ.
ޝާހް އޭނާގެ ކުރިޔަށް އޮތް ފިލްމެއް އަދި ހާމަކޮށްފައިނެތް ނަމަވެސް ސަލްމާން ދަނީ އޭނާގެ އެންމެ ފަހުގެ ފިލްމު "ބާރަތު" ގެ އެންމެ ފަހުގެ މަސައްކަތްތައް ކުރަމުންނެވެ. މި ފިލްމު ރިލީޒް ކުރުމަށް ހަމަޖެހިފައިވަނީ މި އަހަރުގެ އީދު ދުވަހުއެވެ.