ކުރީގެ ރައީސް އަބްދުﷲ ޔާމީންގެ އަމިއްލަ އެކައުންޓުތައް ހިފެހެއްޓި މައްސަލާގައި އެމަނިކުފާނުގެ ފަރާތުން ހުށައެޅި މައްސަލައިގެ ހުކުމް އިއްވުން ފަސްކޮށްފިއެވެ.
ކޯޓު އަމުރެއްގެ ދަށުން ޔާމީންގެ އެކައުންޓުތައް ހިފަހައްޓާފައިވާއިރު އެއެކައުންޓުތަކުގައި 100 މިލިއަން ރުފިޔާއަށް ވުރެ ގިނަ އަދަދަށް ފައިސާ ހުރި ކަމަށް ފުލުހުން ބުނެފައިވެއެވެ.
ޔާމީންގެ ފަރާތުން އެ މައްސަލަ ހައިކޯޓުގައި އިސްތިއުނާފް ކޮށްފައިވާއިރު މިއަދުގެ ޝަރީއަތް އިދާރީ ސަބަބުތަކާ ހެދި ވަނީ ކެންސަލް ކޮށްފައެވެ.
މަނީ ލޯންޑަރިންގެ ތުހުމަތުގައި ޔާމީންގެ އެކައުންޓުތައް ހިފަހައްޓާފައިވާއިރު އެމަނިކުފާނު ވިދާޅުވީ އެކައުންޓުތަކުގައި ހުރި ފައިސާއަކީ އެމަނިކުފާނުގެ އަމިއްލަ ފައިސާ ކަމަށެވެ.
އެމްއެމްޕީއާރްސީ ޚިޔާނާތާ ގުޅިގެން އޭސީސީން ނެރުނު ތަހުގީގީ ރިޕޯޓުގައި ވެސް ޔާމީންގެ އެކައުންޓަށް އެއް މިލިއަން ޑޮލަރު ވަދެފައިވާކަން ހާމަވެފައިވެއެވެ. ނަމަވެސް އެއީ ކޮން ގޮތަކަށް ޖަމާކުރި ފައިސާއެއް ކަމަށް ހާމަކޮށްފައެއް ނުވެއެވެ.