ގާޒާގެ އިރުމަތީގައި ހިނގި މުޒާހަރާއެއްގެ ތެރެއިން އިސްރާއީލްގެ ސިފައިން ދިން ބަޑީގެ ހަމަލާއެއްގައި އުމުރުން 15 އަހަރުގެ ފަލަސްތީނުގެ ކުޑަކުއްޖަކު މަރާލައިފި އެވެ.
ގާޒާގެ ހެލްތު މިނިސްޓްރީގެ ތަރުޖަމާނު އަޝްރަފް އަލް-ޤިދްރާ އާއި ހަވާލާދީ "އަލްޖަޒީރާ" އިން ރިޕޯޓްކުރާ ގޮތުގައި އެ ހަމަލާގައި ބޮލަށް ބަޑިޖެހުމުގެ ސަބަބުން މަރުވެފައި ވަނީ ސައިފް އަލް-ދީން އަބޫ ޒެއިދް ނަމަކަށް ކިޔާ ކުއްޖެއް ކަމަށެވެ.
އިސްރާއީލްގެ ސިފައިން ދިން ހަމަލާތަކުގައި މުޒާހަރާގެ އިތުރު ހަ ބައިވެރިއަކަށްވެސް އަނިޔާވެފައިވާއިރު، އެމީހުން ވަނީ ފަރުވާ އަށް ޝިފާ ހޮސްޕިޓަލަށް ގެންގޮސްފައެވެ.
ފެބްރުއަރީ މަހުއްސުރެ ކޮންމެ ރެއަކު "ނައިޓް ޑިސްޓާބެންސް ޔުނިޓް"ގެ ނަމުގައި ފަލަސްތީންގެ ޒުވާން ފިރިހެނުންތަކެއް ދަނީ އިސްރާއީލްގެ ބޯޑަރު ކައިރިއަށް އެއްވެ މުޒާހަރާކުރަމުންނެވެ. މިއީ މިދިޔަ އަހަރުގެ މާޗު ފަހުކޮޅު ފެށުނު މުޒާހަރާތަކުގެ ބައެކެވެ.
ފަލަސްތީންގެ އެތައް ހާސް ރައްޔިތުންނެއް ވަނީ، އެމީހުންގެ އުފަން ރަށަށް އެނބުރި ދިއުމުގެ ހުއްދަ ދިނުމަށް އެދި ގޮވާލައި އެ މުޒާހަރާތަކުގައި ބައިވެރިވެފައެވެ.