ޑީސީ އެކްސްޓެންޑެޑް ޔުނިވާސްގެ ހަތްވަނަ ފިލްމް ކަމުގައިވާ "ޝަޒަމް!"ގެ ދެވަނަ ޓްރެއިލާ މިދިޔަ ހޯމަ ދުވަހު ރިލީޒްކޮށްފި އެވެ.
ފިލްމްގެ އާ ޓްރެއިލާއިން ޝަޒަމް ބޮޑު ބަހެއް މައްޗަށް ހިއްލާލައި ބެލެންސްކުރާތަން ފެނެއެވެ. މި މަންޒަރަކީ މީގެ ކުރިން "ސުޕަމޭން" އާއި "ވޮންޑާ ވުމަން" އަދި "އަކުއަމޭން"ފަދަ ފިލްމްތަކުން ފެނުނު މަންޒަރާއި އެއްގޮތް މަންޒަރެކެވެ.
މީގެ އިތުރުން ސުޕަމޭން އާއި ބެޓްމޭން އަދި ސައިބޯގްގެ އިތުރުން ދަ ފްލޭޝް އާއި ވޮންޑާ ވުމަންފަދަ ޖަސްޓިސް ލީގްގެ ކެރެކްޓާތަކުގެ ބުދުހުރި ފިހާރައެއްގެ ތެރޭގައި ޝަޒަމް އުޅޭ މަންޒަރު ވެސް އާ ޓްރެއިލާއިން ފެނިގެންދެ އެވެ. އަދި ފިހާރަތެރެއިން ބެޓްމޭންގެ ސްޓެޗޫއެއް ނަގާފައި ވައިގެ ތެރެއަށް އެއްލާލާ މަންޒަރު ފެންނައިރު، އެ ސްޓެޗޫ "ޑާކް ނައިޓް" ގައި ބެން އެފްލެކްގެ ބެޓްމޭން އާއި ވައްތަރެއް ނޫނެވެ. ބެޓްމޭންގެ ބެން އެފްލެކްގެ ވާޝަން ބިންމަތީގައި އޮތް މަންޒަރު ފެންނައިރު، އެ ސްޓެޗޫއަކަށް މާބޮޑު ސަމާލުކަމެއް ޓްރެއިލާގައި ދީފައެއް ނުވެއެވެ. ލަފާކުރެވޭ ގޮތުގައި އެހެން ހަދާފައި ވަނީ ބެޓްމޭން ފިލްމްތަކުން ބެން އެފްލެކް ދެން ނުފެންނާތީ އެވެ.
"ޝަޒަމް!" އަކީ ބިލީ ނަމަކަށް ކިޔާ އުމުރުން 14 އަހަރުގެ ފިރިހެން ކުއްޖަކު، "ޝަޒަމް!" އޭ ބުނުމުން ބޮޑު ސުޕާހީރޯ އަކަށް ބަދަލުވާ ވާހަކަ ދައްކުވައިދޭ ފިލްމެކެވެ. މި ފިލްމަކީ ޑީސީގެ އެހެން ފިލްމްތަކާއި އަޅާބަލާއިރު ކޮމެޑީގެ ބައި ބޮޑު ފިލްމެކެވެ.
މި ފިލްމްގެ ޓައިޓަލް ރޯލް ކުޅެފައި ވަނީ ޒެކަރީ ލީވައި ކަމަށްވާއިރު، ފިލްމް ޑައިރެކްޓްކޮށްފައި ވަނީ ޑޭވިޑް އެފް. ސޭންޑްބާގް އެވެ.
"ޝަޒަމް!" ރިލީޒްކުރުމަށް ހަމަޖެހިފައި ވަނީ އަންނަ އޭޕްރީލް މަހުގެ 05 ވަނަ ދުވަހު އެވެ.