އިންޑިއާގެ ބާރު އޮންނަ ޖައްމޫ އަދި ކަޝްމީރް ސްޓޭޓްގެ ބަސް ސްޓޭޝަނެއްގައި ގްރެނޭޑް ބޮމެއް ގޮއްވާލި ހާދިސާ އާއި ގުޅިގެން ހިޒްބުލް މުޖާހިދީން ހަނގުރާމަވެރި ޖަމާޢަތުގެ މެމްބަރެއް ކަމަށް ތުހުމަތު ކުރެވޭ މީހަކު އިންޑިއާ ސިފައިން ހައްޔަރު ކޮށްފި އެވެ.
އިއްޔެ ހިނގި އެ ހާދިސާގައި މަދުވެގެން ދެ މީހަކު މަރުވެފައިވާއިރު، 30 އަށްވުރެ ގިނަ މީހުންނަށް ވަނީ އަނިޔާވެފައެވެ.
މިދިޔަ މަހު އިންޑިއާގެ ސަލާމަތީ ބާރުތަކާއި ދެކޮޅަށް ދިން ޖާނުން ފިދާވުމުގެ ހަމަލާއާއި ގުޅިގެން އިންޑިއާ އާއި ޕާކިސްތާނާއި ދެމެދު ވަނީ ވައިގެ ހަމަލާތަކެއް ވެސް ބަދަލުކޮށްފަ އެވެ.
އިއްޔެ ހިނގި ހާދިސާ އަކީ ހިޒްބުލް މުޖާހިދީން އިން ދިން ހަމަލާއެއް ނޫން ކަމަށް އެ ޖަމާޢަތުން ވަނީ ބުނެފައެވެ.
އެހެންނަމަވެސް ފުލުހުން "ބީބީސީ އުރްދޫ" އަށް ބުނި ގޮތުގައި އެ ހާދިސާގެ ތުހުމަތުގައި ހައްޔަރުކުރި ޔާސިރް ޖާވިދް ބަޓް ވަނީ އެކަމަށް އަމިއްލައަށް އިއުތިރާފްވެފައި ކަމަށާއި، އޭނާ އަކީ ކަޝްމީރްގެ ޒުވާނެއް ކަމަށެވެ.
އިންސްޕެކްޓަރ ޖެނެރަލް މަނީޝް ކުމާރް ސިންހާ ވިދާޅުވި ގޮތުގައި ގްރެނޭޑް އެއްލުމަށް ޔާސިރް އާއި ހަވާލުކުރީ ކުލްގާމް ޑިސްޓްރިކްޓްގެ ހިޒްބުލް މުޖާހިދީންގެ ކޮމާންޑަރ ފާރޫޤް އަހްމަދު ކަމަށް އޭނާ ތަޙުޤީޤަށް ބުނެފައި ކަމަށެވެ.
ފުލުހުން ދަނީ ޔާސިރް އާއި ބެހޭ އިތުރު އިންޓެލިޖެންސް މަޢުލޫމާތު ހޯދުމުގެ މަސައްކަތް ކުރަމުންނެވެ.