މިމަހު 1ން 7އަށް އައްޑޫ ސިޓީގައި އެފްއޭއެމްގެ ފަރާތުން ބޭއްވި ފުޓްބޯޅަ ބޭސިކް ރެފްރީ ކޯސް ނިންމާލައިފިއެވެ.
7 ދުވަހުގެ މުއްދަތަށް ކުރިޔަށް ގެންދިޔަ މި ކޯހުގައި ޖުމްލަ 12 ފަރާތަކުން ވަނީ ބައިވެރިވެފައެވެ. އޭގެ ތެރޭގައި އަންހެން 5 ބައިވެރިންނާއި ފިރިހެން 7 ބައިވެރިން ހިމެނެއެވެ. މި 12 ބައިވެރިންގެ ތެރެއިން ކޯސް ފުރިހަމަކޮށް ސެޓްފިކެޓް ހާސިލްކޮށްފައިވަނީ 7 ބައިވެރިންނެވެ. އެއީ އަންހެން 4 ބައިވެރިންނާއި ފިރިހެން 3 ބައިވެރިންނެވެ. މިއީ އައްޑޫގައި ބޭއްވުނު ކޯހެއްގައި އަންހެން އެންމެ ގިނަ ބައިވެރިން ފެނިގެން ދިޔަ ފަހަރު ވެސް މެއެވެ.
މި ކޯހުގެ ނިންމުމުގެ ރަސްމިއްޔާތު ބާއްވާފައިވަނީ އައްޑޫ ސިޓީ ހިތަދޫ ނޫރާނީ ސްކޫލްގައެވެ. އެ ރަސްމިއްޔާތު ޝަރަފްކޮށްދެއްވީ ކުރީގެ ރެފްރީ، ކުރީގެ އެފްއޭއެމްގެ ހިތަދޫ އޮފީސް ހިންގުމާއި ހަވާލުވެހުންނެވި އެންމެ އިސްފަރާތް އަދި މިހާރު އާގަލާ މާޓްގެ މެނޭޖަރު ކަމަށްވާ އިބްރާހީމް ރަޝީދު މޫސާ ވަޖުދީއެވެ.
ޝަރަފްވެރިމެހްމާން ބައިވެރިންނާއި މުޚާތަބް ކުރައްވާ ދެއްކެވި ވާހަކަފުޅުގައި އައްޑޫ ސިޓީގައި ރެފްރީން މަދުކަން ފާހަގަކުރައްވާ މި ފަހަރު ކޯސް ނިންމި ފަރާތްތަކުން ކުރިޔަށްއޮތް ތަނުގައި ދަނޑުތަކުން ފެނިގެންދާނެ ކަމަށް އުއްމީދު ކުރައްވާ ކަމަށް ވަނީ ވިދާޅުވެފައެވެ. ރެފްރީކަމަކީ ކުރަން ފަސޭހަ ކަމަކަށް ނުވެފަ ގިނަ ގޮންޖެހުންތަކާއި ކުރިމަތިލާންޖެހޭ ފަދަ ކަމަކަށްވާއިރު ވަރަށް ކެރިގެން ޔަގީންކަމާއިއެކު މިކަމަށް ނިކުތުމަށް ބައިވެރިންނަށް ވަނީ ނަސޭހަތްތެރިވެފައެވެ. 4 އަންހެން ބައިވެރިން ފާސްވެފައިވާއިރު އެ ފަރާތްތަކުން ފުޓްބޯޅައަށް އިތުރު އަންހެން ކުދިން ނެރުމަށް މަސައްކަތްކޮށް ދެއްވުމަށް ވެސް ޝަރަފްވެރި މެހްމާން ވަނީ އެދިވަޑައިގެންފައެވެ. އައްޑޫ ސިޓީއަށް ނިސްބަތްވާ އަންހެން ފުޓްބޯޅަ ކުޅުންތެރިން ގައުމީ ޓީމުން ފެނިގެން ދިޔުމަކީ ކުރާ އުއްމީދެއް ކަމަށް ވެސް އެ ބޭފުޅާ ވަނީ ވިދާޅުވެފައެވެ.
މި ކޯހުގައި ކިޔަވާދެއްވީ އެފްއޭއެމްގެ އިންސްޓްރަކްޓަރ މުހައްމަދު އަނީލް އަބްދުއްލަތީފުއެވެ.