އިސްލާމިކް ސްޓޭޓް އޮފް އިރާޤް އެންޑް ސީރިއާ (އައިސިސްް) އާއި ގުޅުމަށް އިނގިރޭސިވިލާތުގެ ލަންޑަނުން ފިލި ޝަމީމާ ބޭގަމް އަށް ލިބުނު ފިރިހން ދަރިފުޅު ސީރިޔާގައި މަރުވެއްޖެ ކަމަށް ސީރިޔާގެ ޑިމޮކްރާތީ ބާރުތަކުން ބުނެފި އެވެ.
އުމުރުން 19 އަހަރުގެ ބޭގަމް ވިހާފައި ވަނީ މިދިޔަ މަހުގެ ތެރޭގައި އިރުއުތުރު ސީރިޔާގެ ރެފިއުޖީ ކޭމްޕެއްގަ އެވެ. އޭނާ އެނބުރި ޤައުމަށް އަންނަން ބޭނުންވާ ކަމަށް ބުނިނަމަވެސް، އިނގިރޭސިވިލާތުން ވަނީ ބޭގަމްގެ ޔޫކޭ ރައްޔިތުކަން އަތުލައިގެންފަ އެވެ.
"ބީބީސީ" އިން ރިޕޯޓްކުރާ ގޮތުގައި ބޭގަމްގެ ދަރިފުޅު މަރުވެފައި ވަނީ ނިއުމޯނިއާ ޖެހިގެން ކަމަށެވެ.
ބޭގަމް ވަނީ މީގެ ކުރިންވެސް ދެ ކުއްޖަކު ވިހާފައެވެ. ނަމަވެސް ބަލިމަޑުކަމާއި މެލްނިއުޓްރިޝަންގެ ސަބަބުން އެކުދިން ވެސް ވަނީ މަރުވެފައެވެ.
ސީރިޔަން ޑިމޮކްރެޓިކް ފޯސް (އެސްޑީއެފް)ގެ ތަރުޖަމާނު މުސްތަފާ ބާލީ ވަނީ އެކުއްޖާ މަރުވިކަން "އޭއެފްޕީ" އަށް އިއްޔެ ކަށަވަރުކޮށްދީފައެވެ. ނަމަވެސް އެކުއްޖާ މަރުވީ ކިހިނެއްކަން ނުވަތަ ކޮންއިރަކުކަން ބުނެދިނުމަށް އޭނާ ވަނީ އިންކާރުކޮށްފަ އެވެ.
ބޭގަމް ޝަމީމާ އާއި އިތުރު ދެ ސްކޫލް ކުދިން ކަމުގައިވާ ކަދީޒާ ސުލްތާނާ އާއި އާމިރާ އަބާސީ ސީރިއާ އަށް ގޮސް އައިއެސް އާއި ގުޅުމަށްޓަކައި އިރުމަތީ ލަންޑަންގްގެ ބެތުނަލް ގްރީން އިން ފިލީ 2015 ވަނަ އަހަރުގެ ފެބްރުއަރީ މަހުގެ ތެރޭގައެވެ.
"ޓައިމްސް" ނޫހަށް ދިން އިންޓަވިއުގައި ބޭޤަމް ބުނީ ގެއަކަށް ދިން ބޮމުގެ ހަމަލާއެއްގައި ކަދީޒާ މަރުވެފައިވާ ކަމަށާއި، ނަމަވެސް އޭނާގެ އަނެއް ރަހުމަތްތެރިޔާ އަށް ވީނުވީއެއް ނޭނގޭ ކަމަށެވެ.