ފޭސްބުކްގައި އިސްލާމް ދީނަށާއި ކީރިތި ރަސޫލާ މުޙައްމަދު صلى الله عليه وسلم އަށް މަލާމާތްކުރި މެލޭޝިއާގެ ފިރިހެނަކު، 10 އަހަރު ދުވަހަށް ޖަލަށްލުމަށް ޙުކުމްކޮށްފައިވާ ކަމަށް ފުލުހުން ބުނެފި އެވެ.
އުމުރުން 22 އަހަރުގެ "އަޔާ ޔާ" ވަނީ 10 ދައުވާއަކަށް ކުއަލަ ލަމްޕޫރްގެ ކޯޓެއްގައި އިއުތިރާފްވެފައެވެ.
ރޯޔަލް މެލޭޝިއާ ޕޮލިސް އިން ވަނީ އިތުރު ތިން ސޯޝަލް މީޑިއާ އެކައުންޓެއް ހިންގާ ފަރާތްތަކެއްގެ މައްޗަށްވެސް އިސްލާމް ދީނަށާއި ރަސޫލާ އަށް މަލާމާތްކުރިކަމުގެ ތުހުމަތުކޮށްފަ އެވެ.
މެލޭޝިއާގެ "ބާނާމާ" އިން ރިޕޯޓްކުރާ ގޮތުގައި އުމުރުން 52 އަހަރުގެ ފޭސްބުކް ޔޫޒާއެއް ކަމުގައިވާ "ޔާޒިދް ކޮންގް"ގެ މައްޗަށް ވަނީ އިސްލާމް ދީނާއި ކީރިތި ރަސޫލާ އަށް މަލާމާތްކުރިކަމުގެ ދެ ދައުވާ އުފުލާފައެވެ. އޭނާގެ ޙުކުމް ކުރިއަށް އޮތް ދެ ދުވަހުގެ ތެރޭގައި އިއްވާނެއެވެ.
ޓްވިޓާ ޔޫޒާއެއް ކަމުގައިވާ "AlvinChow333" އާއި ފޭސްބުކް ޔޫޒާއެއް ކަމުގައިވާ "Danny A'antonio Jr" ވަނީ އެމީހުންގެ މައްޗަށް އުފުލާފައިވާ ދައުވާތަކަށް އިންކާރުކޮށްފަ އެވެ. އެހެންނަމަވެސް އަންނަ އޭޕްރީލް މަހުގެ ފަސްވަނަ ދުވަހު މައްސަލައިގެ ޝަރީޢަތް ނިމެންދެން އެމީހުން ތިބީ ފުލުހުންގެ ބެލުމުގެ ދަށުގައެވެ.