ސ. ހިތަދޫގައި ހިންގާ ޕްރައިވެޓް ހޮސްޕިޓަލް އައިއެމްޑީސީން އިންޑިއާގެ މެނިޕާލް އޮސްޕިޓަލާ ގުޅިގެން ކުރިއަށް ގެންދާ ހިތުގެ ބައްޔާ ބެހޭ ކޭމްޕް އައްޑޫގައި އިއްޔެ ފަށައިފި އެވެ.
މެނިޕާލް އޮސްޕިޓަލްގެ މަޝްހޫރު ކާޑިއޯ ތޮރޭސިކް އެންޑް ވެސްކިއުލަ ސާޖަރީތަކަށް ޚާއްސަ ޑޮކްޓަރެއް ކަމަށްވާ ޑރ. ދޭވާނަންދާ އެންއެސް އައިއެމްޑީސީގައި ހަތަރު ދުވަހުގެ މުއްދަތަށް ހިތުގެ ބަލި މީހުންނަށް ފަރުވާ ދޭ ގޮތަށް ވަނީ ހަމަޖެހިފަ އެވެ.
މި ކޭމްޕް އައިއެމްޑީސީ ހިންގާ ސިމްޑީގެ އޮފިޝަލަކު ވިދާޅުވީ މަނިޕާލް ހޮސްޕިޓަލާ އައިއެމްޑީސީ ގުޅިގެން ރާއްޖޭގައި މި ވަގުތު ފަރުވާ ލިބެން ނެތް ހާއްސާ ބަލިތަކަށް ފަރުވާ ހޯދޭނޭ ގޮތް ހޯދައި ދިނުމަށް މަސައްކަތް ކުރަމުން ގެންދާ ކަމަށެވެ.
އެގޮތުން ހިތުގެ ބައްޔާއި، ކެންސަރާއި އަދި ތެލެސީމިއާ އަށް އިސްކަން ދީގެން މަސައްކަތް ކުރަމުން އަންނަ ކަމަށް އޭނާ ވިދާޅުވި އެވެ.
ޑރ. ދޭވާނަންދާ ރެއިން ފެށިގެން ހިތުގެ ބަލި މީހުންނަށް ފަރުވާ ދޭން ފަށާފައިވާ އިރު އެޕޮއިންޓްމެންޓް ހަދަން ބޭނުންވާ މީހުންނަށް އެފުރުސަތު އަދިވެސް އޮތީ ހުޅުވާލާފަ އެވެ. އެ ހޮސްޕިޓަލްގެ ނަމްބަރަކީ 7998802 އަދި 6888802 އެވެ.