ގާނޫނީ ޚިދުމަތުގެ ބިލް މަޖިލީހުގައި އެޖެންޑާވެސް ނުކުރާނެ ކަމަށާއި ވޯޓަށްވެސް ނޭހޭނެ ކަމަށް މަޖިލީހުގެ ރައީސް ގާސިމް އިބްރާހިމް ވިދާޅުވެއްޖެއެވެ.
ގާސިމް މިހެން ވިދާޅުވެފައިވަނީ އެމްޑީޕިގެ ރައީސް، މުހައްމަދު ނަޝީދު ދެއްކެވި ވާހަކަފުޅަކަށް ރައްދު ދެއްވަމުންނެވެ. ނަޝީދު ވިދާޅުވީ، ގާސިމް އެ ބިލު މަޖިލީހަށް އެޖެންޑާ ނުކުރަނީ ޖޭއެސްސީގެ މެމްބަރު ލަތީފާ ގާސިމްގެ މަސްލަހަތު ހިމާޔަތް ކުރަން ކަމަށެވެ.
ރޭ ޖުމުހޫރީ ޕާޓީން ބޭއްވި ނޫސްވެރިންގެ ބައްދަލުވުމެއްގައި ވާހަކަ ދައްކަވަމުން ގާސިމް ވިދާޅުވީ އެމަނިކުފާނު މަޖިލީހުގެ ރައީސްގެ މަގާމުގައި ހުރިހާ ހިނދަކު އެ ބިލް އެ އޮތް ގޮތުން ބިލް އެޖެންޑާ ނުކުރާނެ ކަމަށެވެ. ސަބަބަކީ އެ ބިލް ފަރުމާ ކޮށްފައިވަނީ ގާނޫނު އަސާސީއާ ޚިލާފަށް ކަމަށް ގާސިމް ވިދާޅުވިއެވެ.
ގާނޫނީ ޚިދުމަތުގެ ބިލަކީ ގާނޫނީ ވަކީލުން މޮނިޓާ ކުރަން ބާ އެސޯސިއޭޝަނެއް އުފެއްދުމާއި ވަކީލުންގެ ބާރުތައް އެ އެސޯސިއޭޝަނަށް ދިނުމާ ގުޅޭގޮތުން އެމްޑީޕީން ފަރުމާކޮށް، މާފަންނު އުތުރު ދާއިރާގެ މެމްބަރު އިމްތިޔާޒް ފަހުމީ މަޖިލީހަށް ހުށައެޅުއްވި ބިލެކެވެ.