ރައީސުލް ޖުމުހޫރިއްޔާ އިބްރާހިމް މުހައްމަދު ސޯލިހްގެ ވެރިކަމުގެ ފުރަތަމަ ދުވަހު އެމަނިކުފާނު އުފެއްދެވި ރިޔާސީ ކޮމިޝަންތަކަށް ބާރު ދިނުމަށް މަޖިލީހުގައި ވޯޓަށް އެހުމަށް ތިން ފަހަރު ކުރި މަސައްކަތް ވެސް ނާކާމިޔާބުވީ މަޖިލީހުގެ ރައީސް ގާސިމް އިބްރާހިމްގެ އެންގުމަށް ކަމަށް ދޭހަވާ ގޮތަށް އެމަނިކުފާނު ވާހަކަފުޅު ދައްކަވައިފިއެވެ.
އިއްޔެ އައްޑޫ ސިޓީ ހިތަދޫގައި ރައީސް ސޯލިހް ވިދާޅުވީ މަޖިލީހުގައި ކަން ހިނގާދިޔައީ ކުރިން ވީ ވައުދާ ޚިލާފަށް ކަމަށެވެ. މަޖިލީހުން ރިޔާސީ ކޮމިޝަންތަކަށް ބާރުދޭން ކުރި މަސައްކަތް ޖޭޕީ މެމްބަރުން ހާޒިރުނުވުމުގެ ސަބަބުން ނާކާމިޔާބުވުމުން އެކަމާ ގުޅޭގޮތުން ރައީސް ދެއްކެވި ވާހަކާގައި ވިދާޅުވިއެވެ.
ރައީސްގެ ވާހަކަތަކަށް ރައްދު ދެއްވަމުން ރޭ، ޖޭޕީން ބޭއްވި ނޫސްވެރިންގެ ބައްދަލުވުމެއްގައި ގާސިމް ވިދާޅުވީ ރައީސް ދެއްކެވި ވާހަކަފުޅާ މެދު ހައިރާންވެވަޑައިގެންފައިވާ ކަމަށެވެ. އަދި އެ ބިލްތައް ހުރީ ގާނޫނު އަސާސީއާ ޚިލާފުކޮށް ކަމަށާއި އެހެން ހުއްޓާ ފާސްކުރާނީ ކިހިނެއްތޯ ގާސިމް ސުވާލު އެއްސެވިއެވެ.
ނަމަވެސް ބިލުތަކަށް ވޯޓަށް އެހުމުން ޖޭޕީގެ ބައެއް މެމްބަރުން މަޖިލީހަށް ހާޒިރުނުވުމާ ގުޅިގެން ޖޭޕީގެ ޕީޖީ ލީޑަރ ކިނބިދޫ ދާއިރާގެ މެމްބަރު އަބްދުﷲ ރިޔާޒު ވިދާޅުވީ އޭނާ ޖޭޕީގެ ހުރިހާ މެމްބަރުންނަށް ވޯޓުގައި ބައިވެރިވުމަށް މެސެޖުކޮށް އަންގާފައިވާނެ ކަމަށެވެ.
ރިޔާޒް ވިދާޅުވީ ވޯޓުގައި ބައިވެރި ނުވި ނަމަވެސް ޖޭޕީ މެމްބަރުން މަޖިލިސް ތަޅުމުގައި ހާޒިރުވެ ތިބިކަން އެނގިފައިވާ ކަމަށާއި އެމެމްބަރުންނާ ސުވާލުކޮށް ނައި ސަބަބު އޮޅުންފިލުވާނެ ކަމަށެވެ.
ނަމަވެސް މިހާތަނަށް އެ ސަބަބެއް ރިޔާޒު މީޑިޔާގައި ހިއްސާކޮށްފައިނުވި ނަމަވެސް ރޭ ގާސިމް ދެއްކެވި ވާހަކަފުޅުން ދޭހަވަނީ އެ މެމްބަރުން ހާޒިރުނުވީ ގާސިމް އަންގައިގެން ކަމަށެވެ.