އިދިކޮޅު ކޯލިޝަން، ޕީޕީއެމް/ޕީއެންސީ އާ ނުގުޅޭނެ ކަމަށާއި ރައީސް ސޯލިހުގެ ސަރުކާރު ދިފާއު ކުރައްވާނެ ކަމަށް ޓޫރިޒަމް މިނިސްޓަރ އަލީ ވަހީދު ވިދާޅުވެއްޖެއެވެ.
ޖޭޕީގެ ރައީސްކަމުގެ މަގާމުގައި ވެސް ހުންނެވި އަލީ ވަހީދު މިއަދު ކުރެއްވި ޓުވީޓެއްގައި ވިދަޅުވީ މާތްﷲ ގަންދީ ހުވާކޮށްގެން ހުރީ ދިވެހި ރައްޔިތުންނަށާއި ދިވެހި ގައުމަށާއި ރައީސް ސޯލިހަށް އިޚުލާސްތެރިކަމާއެކު ޚިދުމަތް ކުރަން ކަމަށެވެ. އަދި އެމްޑީޕީއާ އެކު އިސްލާހީ މަސައްކަތުގައި ގުރުބާންވި ޖޭޕީ، އަދާލަތު ޕާޓީ އަދި އެމްއާރްއެމްގެ މީހުން ދޫކޮށް އިދިކޮޅު ކޯލިޝަނާ ނުގުޅޭނެ ކަމަށް އޭނާ ވިދާޅުވިއެވެ.
ޖުމުހޫރީ ޕާޓީން ރޭ ބޭއްވި ނޫސްވެރިންގެ ބައްދަލުވުމެއްގައި ޕާޓީގެ ލީޑަރ ގާސިމް އިބްރާހިމް ވިދާޅުވީ އަދިވެސް މިތިބީ ސަރުކާރުގައި ކަމަށާއި އިދިކޮޅާ ކޯލިޝަނެއް ނަހަދާ ކަމަށެވެ. ނަމަވެސް އިދިކޮޅު ކޯލިޝަނުން ވަނީ ޖުމުހޫރީ ޕާޓީގެ ކެންޑިޑޭޓުންނަށް ތާއީދުކޮށް 27 ދާއިރާއެއްގައި ވާދަނުކުރަން ނިންމާފައެވެ.
އަދި ޖޭޕީން ވެސް ވަނީ މަހިބަދޫ ދާއިރާގެ ކެންޑިޑޭޓުގެ ޓިކެޓު އަތުލައި އިދިކޮޅު ކެންޑިޑޭޓު އަހުމަދު ތޯރިގަށް ތާއީދުކުރުމަށް ނިންމާފައެވެ.