ނިމިގެން ދިޔަ 2018 ވަނަ އަހަރު 1299 މައްސަލަ ބަލާފައިވާ ކަމަށާއި އޭގެ ތެރެއިން 7 މައްސަލަ ޕީޖީ އޮފީހަށް ހުށަހަޅާފައިވާކަމަށް އެންޓި ކަރަޕްޝަން ކަމިޝަން (އޭސީސީ)އިން ބުނެފިއެވެ.
އޭސީސީގެ މިދިޔަ އަހަަރުގެ ރިޕޯޓު ނެރުމަށް ބޭއްވި ނޫސް ކޮންފަރެންސްގައި ކަމިޝަންގެ ނައިބް ރައީސް މުއައްވިޒު ރަޝީދު ވިދާޅުވީ މިދިޔަ އަހަރު ކަމިޝަނުން ބެލި 1299 މައްސަލަ ތަކުގެ ތެރެއިން 1292 މައްސަލަ ނިމިފައިވަނީ އެ މައްސަލަ ތަކުގައި ކަރަޕްޝަން ނުހިމެނޭކަމަށެވެ.
މުއައްވިޒު ވިދާޅުވީ އޭގެ ތެރެއިން 7 މައްސަލައެއް ޕީޖީ އޮފީހަށް ފޮނުވާފައިވާކަމަށެވެ. އެ މައްސަލަ ތަކުގައި ޖުމްލަ 14 ދައުވާއެއް އުފުލާފައިވާއިރު އޭގެ ތެރޭގައި ހިމެނެނީ ނާޖާއިޒު ފައިދާ ނެގުމާއި، ނާޖާއިޒު ފައިދާ ހޯދައިދިނުމަށް މަސައްކަތް ކުރުމުގެ އިތުރުން ދައުލަތަށް ބަދަލު ހޯދައި ދިނުމުގެ ދައުވާއެވެ.
މުއައްވިޒު ވިދާޅުވީ މިދިޔަ އަހަރު ކުންފުނިތަކާއި ގުޅޭ 129 މައްސަލަ އަކާއި ހައުސިން އާއި ގުޅޭ 98 މައްސަލައެއް ކަމިޝަނަށް ހުށަހެޅިފައިވާ ކަމަށެވެ. މީގެ އިތުރުން އެންމެ ގިނަ މައްސަލަ ހުށަހެޅިފައިވަނީ ކައުންސިލް ތަކާއި ގުޅޭ ގޮތުން ކަމަށެވެ.
މިދިޔަ އަހަރު އޭސީސީން ނިންމި މައްސަލަ ތަކުގެ އަދަދު 2017 ވަނަ އަހަރަށް ވުރެ ދަށްކަމަށް އޭސީސީން ބުންޏެވެ.