ޕީޕީއެމްގެ ޕީޖީ ލީޑަރ އަހުމަދު ނިހާން ހުސެއިންމަނިކު، މިސަރުކާރުގެ ޔޫތް މިނިސްޓަރު އަހުމަދު މަހްލޫފް އެބޭފުޅުންގެ ފަޅިއާ އަލުން ގުޅިވަޑައިގަތުމަށް އެދި ފޮނުވި ދައުވަތަށް މަހްލޫފް އިންކާރު ކުރައްވައިފިއެވެ.
ރާއްޖެ ދުށް ހިތްވަރުގަދަ ކެރޭ ސިޔާސީ ބަތަލުން އައީ ޑީއާރުޕީ އަދި ޕީޕީއެމުން ކަމަށާއި އަލުން ޕީޕީއެމާއި ގުޅިވަޑައިގަތުމަށް ނިހާން ވަނީ މަހްލޫފަށް ދައުވަތު އަރުވާފައެވެ.
އަދި އެމްޑީޕީ ދޫކޮށް ރައްޔިތުންގެ ފަޅިއަށް ވަޑައިގަތުމަށް މަހުލޫފަށް ނިހާން ވަނީ ގޮވާލާފައެވެ. ޖަވާބުގައި މަހްލޫފް ވިދާޅުވީ، ގޭގަ ހުންނަން ޖެހުނަސް ނިހާންގެ ފަޅިއަށް ނުދާނެ ކަމަށާއި މިހާރު ހުންނެވީ ރައްޔިތުންގެ ފަޅީގައި ކަމަށެވެ.
"ގޭގަ ހުންނަން ޖެހުނަސް، ވަޒީރުކަމުން ވަކިކުރިޔަސް އަދި މަގުމަތީ ސަލާން ޖަހަން ޖެހުނަސް އަޅުގަނޑު އިރާދަކުރެއްވިއްޔާ ހުންނާނީ މިގޮތުގަ. އަޅުގަނޑު މިހުރީ ރައްޔިތުންގެ ފަޅީގައި،"
މަހްލޫފް ވަނީ އެމްއެމްޕީއާރްސީ ތަހުގީގު ރިޕޯޓުން އޭނާއަށް ޑޮލަރުތަކެއް ޖަމާކުރި ކަން ހާމަވުމުން އެމައްސަލަ ބަލައި ނިމެންދެން ގޭގައި ބެހެއްޓިފައެވެ. އޭނާ ވަނީ އެ މައްސަލަ އަވަހަށް ބަލާ ދިނުމަށް އޭސީސީއަށް އެދިފައެވެ. އަދި ރައީސްގެ އެނިންމެވުމަށް އިހުތިރާމް ކުރާ ކަމަށް ވެސް މަހްލޫފް ވިދާޅުވިއެވެ.