ކޮލޮމްބިއާގެ މޭތާ ޕްރޮވިންސްގައި އިއްޔެ ބޯޓެއް ވެއްޓި، އޭގެއިން ދަތުރުކުރި 14 މީހުން މަރުވެއްޖެ ކަމަށް އެ ޤައުމުގެ ސިވިލް ޑިފެންސް އިން ބުނެފި އެވެ.
ސިވިލް ޑިފެންސް އާއި ހަވާލާދީ ބޭރުގެ މީޑިއާތަކުން ރިޕޯޓްކުރާ ގޮތުގައި މި ފްލައިޓް ވެއްޓިފައި ވަނީ ކޮލޮމްބިއާގެ ސެން ހޯސޭ ދެލް ގުއަވިއަރޭ އިން ވިލަވިސެންސިއޯ އަށް ދަތުރުކުރަމުން ދަނިކޮށް ކަމަށެވެ. މި ފްލައިޓް އިމާޖެންސީ އަށް ގުޅާފައި ވަނީ ކޮލޮމްބިއާ ގަޑިން އިއްޔެ ހެނދުނު 10:40 ގައި ކަމަށް އެ ޤައުމުގެ ސިވިލް އޭވިއޭޝަން އޮތޯރިޓީ އިން ބުނެއެވެ. މި ބޯޓު ފެނުނީ ވިލަވިވެންސިއޯ ކައިރީ އޮންނަ ލަ ބެނިސިއޮން އިންނެވެ.
ލޭޒަރ އެއާލައިންސް އިން ކުރި ޓްވީޓެއްގައި ވަނީ މިހާދިސާގައި މަރުވި މީހުންގެ ނަންތައް އާންމުކޮށްފަ އެވެ. އޭގެ ތެރޭގައި ވޯޕްސް ޕްރޮވިންސްގެ މޭޔަރ ވެސް ހިމެނެއެވެ.
މި ހާދިސާ ހިނގަން މެދުވެރިވި ސަބަބެއް އަދި އެނގިފައެއް ނުވެއެވެ.
ކޮލޮމްބިއާގެ ސިވިލް އޭވިއޭޝަން އިން ވަނީ މި ހާދިސާގައި ނިޔާވި މީހުންނަށް ތަޢުޒިޔާ ފޮނުވައި، ބަޔާނެއް ނެރެފައެވެ.