ދިވެހި ސަރުކާރުން އިންތިޒާމްކޮށްގެން ބާއްވާ ހަތަރު ވަނަ މޯލްޑިވްސް – އީޔޫ ޕޮލިސީ ޑައިލޮގް މާދަމާ ބާއްވަން ނިންމައިފި އެވެ.
ފޮރިން މިނިސްޓްރީ އިން ބުނީ މި ޑައިލޮގްގެ މައިގަނޑު ބޭނުމަކީ ރާއްޖެއާއި ޔޫރަޕިއަން ޔޫނިއަން (އީޔޫ) އާއި ދެމެދު ހުޅުވާލެވިފައިވާ އަދި ބިނާކުރަނިވި މަޝްވަރާތަކެއް ކޮށް، އެކި ދާިއރާތަކުން ދެ ފަރާތުގެ މެދުގައި ޚިޔާލު ބަދަލުކުރުން ކަމަށެވެ.
މިއަހަރުގެ ޕޮލިސީ ޑައިލޮގްގައި، ރައީސް އިބްރާހިމް މުހައްމަދު ސޯލިހުގެ ސަރުކާރުން އިސްކަންދެއްވާ އެކިއެކި ދާއިރާތަކުން އީޔޫ އާއިއެކު އިތުރަށް ގުޅުން ބަދަހިކުރެވިދާނެ ގޮތްތަކާއި ބެހޭ ގޮތުން މަޝްވަރާކުރެވޭނެއެވެ.
ފޮރިން މިނިސްޓްރީ އިން ބުނީ މިއަހަރުގެ ޑައިލޮގްގައި މަޝްވަރާކުރެވޭނެ މައިގަނޑު ދާއިރާތަކަކީ ތަރައްޤީގެ ދާއިރާގައި އެއްބާރުލުން ދިނުން، ޑިމޮކްރަސީ، ގަވަރނަންސް، އިންސާނީ ހައްޤުތައް، މޫސުމީ ބަދަލުތައް އަދި ސަލާމަތީ ދާއިރާގައި އެއްބާރުލުން އިތުރުކުރުން ކަމަށެވެ.
ޕޮލިސީ ޑައިލޮގްގައި ބައިވެރިވެވަޑައިގަންނަވާ އީޔޫ ވަފުދުގެ އިސްބޭފުޅަކަށް ހުންނަވާނީ އީޔޫއަށް ރާއްޖެއަށް ކަނޑައަޅުއްވާފައި ހުންނަވާ ސަފީރު ޓުން ލައި މާރގް އެވެ. އީޔޫގެ ވަފުދުގައި ދެން ހިމެނިވަޑައިގަންނަވަނީ ޔޫރަޕިއަން ޔޫނިއަން، ފްރާންސް، ޖަރމަނީ، ނެދަލެންޑްސް، އޮސްޓްރިއާ، ޗެކް ރިޕަބްލިކް، ސްވިޑްން، ޕޮލެންޑް، ރޮމޭނިއާ، އިޓަލީ އަދި ޔުނައިޓެޑް ކިންގްޑަމްއިން ރާއްޖެއަށް ކަނޑައަޅާފައިވާ މިޝަންތަކުގެ ހެޑް އޮފް މިޝަންސް ނުވަތަ ޑެޕިއުޓީ ހެޑް އޮފް މިޝަންސްއެވެ.
ރާއްޖޭގެ ވަފުދުގައި އިސްކޮށް ހުންނަވާވީ ފޮރިން މިނިސްޓަރ އަބްދުﷲ ޝާހިދު ކަމުގައިވާއިރު، މިނިސްޓަރ އޮފް ފައިނޭންސް، މިނިސްޓަރ އޮފް ނޭޝަނަލް ޕްލޭނިންގ އެންޑް އިންފްރާސްޓްރަކްޗަރ، މިނިސްޓަރ އޮފް ޓުއަރިޒަމް، މިނިސްޓަރ އޮފް އިކޮނޮމިކް ޑިވެލޮޕްމަންޓް، މިނިސްޓަރ އޮފް ފިޝަރީޒް، މެރިން ރިސޯސަސް އެންޑް އެގްރިކަލްޗަރ، މިނިސްޓަރ އޮފް އެންވާރަމެންޓް އަދި މިނިސްޓަރ އޮފް ހޯމްގެ އިތުރުން ސަރުކާރުގެ އެހެން ބައެއް އިސް ބޭފުޅުން ވެސް ދިވެހި ވަފުދުގައި ހިމެނިވަޑައިގަންނަވައެވެ.
މީގެ އިތުރުން އީޔޫ ވަފުދުގެ ބޭފުޅުން ރައީސް ސޯލިހުގެ އަރިހަށް އިޙްތިރާމްގެ ޒިޔާރަތެއް ކުރެއްވުމަށް ހަމަޖެހިފައިވާ ކަމަށްވެސް ފޮރިން މިނިސްޓްރީ އިން ބުނެއެވެ.