މި ސަރުކާރުގެ ޔޫތް މިނިސްޓަރ އަހުމަދު މަހްލޫފްގެ އަމިއްލަ އެކައުންޓަށް އެމްއެމްޕީއާރްސީ ފައިސާއިން ޑޮލަރު ވަން މައްސަލާގައި އޭސީސީން ކުރި ތަހުގީގުގައި ފާހަގަކުރެވުނު ނުކުތާތައް ރައީސްއަށް ދަންނަވައިފިއެވެ.
ރައީސް އިބްރާހިމް މުހައްމަދު ސޯލިހް ވަނީ މަހްލޫފްގެ ނަން ރިޕޯޓުގައި އޮތުމުން، މައްސަލަ ބަލައި ނިމެންދެން މަހްލޫފް ގޭގައި މަޑުކުރުމަށް އަންގަވާފައެވެ. މަހްލޫފްގެ އިތުރުން ޕްލޭނިން މިނިސްޓްރީގެ ސްޓޭޓް މިނިސްޓަރު އަކްރަމް ކަމާލުއްދީނާއި ފެން ކުންފުނީގެ ޗެއާމަން އަހުމަދު މައުސޫމުވެސް ވަނީ ޑޮލަރުގެ މުއާމަލާތް ހިނގިކަން ސާބިތުވުމުން ގޭގައި މަޑުކުރަން އަންގަވާފައެވެ.
އޭސީސީން ވަނީ މިހާރު އެ ދެބޭފުޅުންގެ މައްސަލަވެސް މަހްލޫފްގެ މައްސަލައާއެކު ބަލައި، ފާހަގަވި ކަންކަން ރައީސްގެ ސަމާލު ކަމަށް ގެންނަވާފައެވެ. އެނގިފައިވާ ގޮތުގައި އޭސީސީން ވަނީ މިބޭފުޅުންގެ ބަޔާން ނަގައި، ކޮމިޝަނުން ކުރި ތަހުގީގުތަކުގެ ރިޕޯޓުވެސް ރައީސްއަށް ފޮނުވާފައެވެ.
އެމްއެމްޕީއާރްސީ ފައިސާއިން އެސްއޯއެފް ކުންފުނިން ވަނީ ރާއްޖޭގެ ބޮޑެތި ވިޔަފާރިތަކާއި ނުފޫޒުގަދަ ބޭފުޅުންނާ ޑޮލަރުގެ މުއާމަލާތްކޮށްފައެވެ. ނަމަވެސް އެފަރާތްތަކުން ވަނީ ކޮށްފައިވަނީ ވިޔަފާރީގެ ބޭނުމަށް ސައްހަ މުއާމަލާތް ކަމަށް ބުނެފައެވެ.