އިއްޔެ ވެއްޓުނު އިތިއޮޕިއަން އެއާލައިންސްގެ ފްލައިޓްގައި ކެންޔާގެ ވެރިރަށް ނައިރޯބީގައި ބާއްވާ އދ. ގެ ތިމާވެއްޓާއި ބެހޭ ސަމިޓެއްގައި ބައިވެރިވުމަށްޓަކައި ދަތުރުކުރަމުންދިޔަ އިންސާނުންގެ ލާބައަށް މަސައްކަތްކުރާ ފަރާތްތަކާއި، ބައިނަލްއަޤްވާމީ ގިނަ މާހިރުން ތިބި ކަމަށް ރިޕޯޓްތައް ބުނެފި އެވެ.
އދ. ގެ ސެކްރެޓަރީ ޖެނެރަލްގެ ތަރުޖަމާނު ސްޓީފެން ޑުޖާހިޗް އާއި ހަވާލާދީ "ސީއެންއެން" އިން ރިޕޯޓްކުރާ ގޮތުގައި ފްލައިޓް އީޓީ302 ވެއްޓުނު ހާދިސާގައި މަރުވި 157 މީހުންގެ ތެރޭގައި އދ. ގެ 22 މުވައްޒަފަކުވެސް ހިމެނޭ ކަމަށެވެ.
އިތިއޮޕިއަން އެއާލައިންސް އިން ބުނީ ފްލައިޓް ވެއްޓުނުއިރު، އޭގައި 35 ޤައުމަކަށް ނިސްބަތްވާ މީހުން ތިިބި ކަމަށެވެ.
އެފްރިކަން ޔޫނިއަންގެ ހެޑްކުއާޓާސް ހުންނަ އަދިސް އަބަބާ އާއި އެފްރިކާގައި ހުންނަ އދ.ގެ ހެޑްކުއާޓާސް ހުންނަ ނައިރޯބީ އާއި ދެމެދު މުވައްޒަފުން ދަތުރުކުރުމަށް އާންމުކޮށް ބޭނުންކޮށް އުޅެނީ އިތިއޮޕިއަން އެއާލައިންސް އެވެ.
އެހެންނަމަވެސް އިއްޔެ ވެއްޓުނު އެއާލައިންގައި އާދަޔާއި ޚިލާފަށް އދ.ގެ މުވައްޒަފުން ގިނައެވެ. އެއީ މިއަދު ފެށުނު އދ.ގެ ތިމާވެއްޓާއި ބެހޭ މަޖިލީހުގައި ބައިވެރިވުމަށް ދަތުރުކުރަމުންދިޔަ ފަރާތްތައް ވެސް ފްލައިޓްގައި ތިބުމުންނެވެ. މި ސަމިޓަކީ ތިމާވެއްޓާއި ބެހޭ ނިންމުންތައް ނިންމާ ދުނިޔޭގެ އެންމެ މަތީ ފެންވަރުގެ މަޖިލީހެވެ.
އެ މަޖިލިސް ހުޅުވުމަށް ބޭއްވި ރަސްމިއްޔާތުގައި އދ. ގެ އޮފިޝަލުން ވަނީ އިއްޔެ ހިނގި ހިތާމަވެރި ހާދިސާގައި މަރުވި އެ ޖަމިއްޔާގެ މުވައްޒަފުންގެ ހަނދާންތައް އާކޮށްފައެވެ.
އެ ހާދިސާގައި މަރުވި މީހުންގެ ތެރޭގައި ކެންޔާގެ 32 ރައްޔިތުންނާއި، ކެނެޑާގެ 18 ރައްޔިތުންނާއި، އިތިއޮޕިއާގެ 09 ރައްޔިތުންނާއި، އެމެރިކާ އާއި ޗައިނާ އަދި އިޓަލީގެ 08 ރައްޔިތުންނާއި ފަރަންސޭސްވިލާތާއި އިނގިރޭސިވިލާތުގެ 07 ރައްޔިތަކު ވެސް ހިމެނޭ ކަމަށް އެ އެއާލައިނުން ވަނީ ބުނެފައެވެ. މަރުވެފައިވަނީ ކޮން ބައެއްކަން އަދި ރަސްމީ އެއްވެސް ސިފައެއްގައި ކަށަވަރުކޮށްދީފައެއް ނުވެއެވެ.