މިއަދު ކުރުނބާ މޯލްޑިވްސްގައި ބޭއްވި ރާއްޖެ އަދި ޔޫރަޕިއަން ޔޫނިއަން (އީޔޫ)ގެ ހަތަރުވަނަ ޕޮލިސީ ޑައިލޮގްގައި ބައިވެރިވެވަޑައިގަތުމަށް ރާއްޖެ އައި އީޔޫގެ ގެ ސަފީރުންގެ ވަފުދު، ރައީސް އިބްރާހިމް މުހައްމަދު ސޯލިހުގެ އަރިހަށް އިޙްތިރާމްގެ ޒިޔާރަތެއް ކުރައްވައިފި އެވެ.
ރައީސް އޮފީހުގައި ބޭއްވި މި ބައްދަލުވުމުގައި ރައީސް އާއި އީޔޫގެ ސަފީރުން ވަނީ އެކިއެކި މައްސަލަތަކާއި ގުޅޭގޮތުން މަޝްވަރާކުރައްވައިފައެވެ. އެގޮތުން އަންނަ މަހު ބާއްވާ ރައްޔިތުންގެ މަޖިލީހުގެ އިންތިޚާބާއި ގުޅިގެން ރާއްޖޭގެ ސިޔާސީ މަސްރަހު މިހާރު އޮތް ޙާލަތާއި ބެހޭގޮތުން ވަނީ މަޝްވަރާކުރައްވައިފަ އެވެ.
މި ބައްދަލުކޮށްލެއްވުމުގައި ރައީސް ދެއްކެވި ވާހަކަފުޅުގައި ރާއްޖޭގައި ޑިމޮކްރެސީ ދަމަހައްޓައި ވަރުގަދަކުރުމަށް މި ސަރުކާރުން ކުރައްވާ މަސައްކަތުގެ ތެރެއިން ކުރިއަށް އޮތް އިންތިޚާބަކީ މިނިވަން، އިންސާފްވެރި އަދި ވާދަވެރި އިންތިޚާބަކަށް ހެދުމަށް މަސައްކަތްކުރައްވާނެ ކަމަށް ވިދާޅުވި އެވެ.
މީގެ އިތުރުން، އީޔޫ އާއި ރާއްޖެއަށް ފައިދާކުރުވަނިވިފަދަ ޕޮލިސީތަކުގައި ބައިވެރިވުމަށް މި ސަރުކާރުން ޝައުޤުވެރިވާ ކަމަށާއި، އީޔޫގެ ޤައުމްތަކާއި ރާއްޖެއާއި ދެމެދު ވިޔަފާރީގެ ގުޅުންތައް ބަދަހިކުރުމާމެދު ވެސް ރައީސް ވަނީ މަޝްވަރާކުރައްވައިފަ އެވެ.
ހަމަ އެފަދައިން، ސަފީރުން ވެސް ވަނީ ރާއްޖެއާއި އީޔޫގެ ޤައުމްތަކާއި ދެމެދު އިންވެސްޓްމެންޓް އަދި އިޤްތިޞާދީ އެއްބާރުލުން ޤާއިމްކުރެވޭނެ ގޮތްތަކާއި ގުޅޭގޮތުން މަޝްވަރާކުރައްވައިފަ އެވެ.
މި ބައްދަލުވުން ނިންމަވާލައްވަމުން ސަފީރުންގެ ވަފްދުން ވަނީ މި ސަރުކާރުގެ ފުރަތަމަ 100 ދުވަހުގެ އެޖެންޑާގެ ކާމިޔާބީ އަށް ތަޢުރީފް ވިދާޅުވެ، ދިވެހި ރައްޔިތުންގެ ކަންތައްތައް ފުއްދައިދިނުމުގެ ޒިންމާ އަދާކުރުމުގައި ރައީސް އަށް ކާމިޔާބަކަށް އެދިފައެވެ.