ތ. ތިމަރަފުށީގައި ހިނގާފައި ދިޔަ އަންހެނެއްގެ ގައިގައި ވޭނަކުން ޖެހި ނުރައްކާތެރި އެކްސިޑެންޓެއް ހިނގައިފިއެވެ.
ފުލުހުންގެ މީޑިޔާ އޮފިޝަލް ވިދާޅުވީ މިއަދު ހެނދުނު ހިނގި މިއެކްސިޑެންޓުގައި އަނިޔާވެފައިވަނީ އުމުރުން 54 އަހަރުގެ އަންހެނަކަށް ކަމަށެވެ.
މިއެކްސިޑެންޓު ހިނގާފައިވަނީ ތިމަރަފުށި ހިއްކި ސަރަހައްދުން އެއާޕޯޓަށް ދާން އޮންނަ މަގުން އަންހެން މީހާ ހިނގާފައިވަނިކޮށް ކަމަށާއި އެކްސިޑެންޓު ހިނގާފައިވަނީ ހެނދުނު 7:45 އެހާކަށްހާއިރު ކަމަށް ފުލުހުން މައުލޫމާތު ދެއެވެ.
އަނިޔާވި އަންހެން މީހާގެ ބޮލުގެ ތިން ތަނުން ފަޅައިގެން ގޮސްފައިވާއިރު އެހެނިހެން ކުދި އަނިޔާތަކެއް ވެސް ބޭރުފުށުން ލިބިފައިވާ ކަމަށް ވޭމަންޑޫ ހޮސްޕިޓަލާ ހަވާލާދީ ފުލުހުން ބުނެފައިވެއެވެ.
އަދި އިތުރު ފަރުވާއަށް އޭނާ މިހާރު މާލެ ގެންދިއުމުގެ މަސައްކަތް ވެސް ކުރަމުން އަންނަ ކަމަށް ފުލުހުން ބުނެފައިވެއެވެ.