މަޖިލީހަށް މީހުން ހޮވުމުގައި އެ ކެންޑިޑޭޓަކީ މޭންޑޭޓް އެނގޭ މީހެއްތޯ ބެއްލެވުމަށާއި އެ ނޭނގޭ މީހަކު މަޖިލީހަށް ހޮވައިފިނަމަ ސިޔާސީގޮތުން "ހަށިވިއްކާ" މީހަކަށް އޭނާ ވެދާނެކަމަށް ރާއްޖޭގެ މަޝްހޫރު ދީނީ އިލްމުވެރިއެއް ކަމަށްވާ ޝެއިޚް މުހައްމަދު އަނީލް ވިދާޅުވެއްޖެއެވެ.
ޝެއިޚް އަނީލް މިހެން ވިދާޅުވެފައިވަނީ މަޖިލިސް 2019އަށް ކުރިމަތިލައްވާފައިވާ ބައެއް ކެންޑިޑޭޓުންގެ ވައުދުތަކަށް ބައްލަވާ ކުރައްވާފައިވާ ޓްވީޓްތަކެއްގައެވެ.
"މަޖިލިސް 2019ގައި ކުރިމަތިލާ ވަރަށް ގިނަ ކެނޑިޑޭޓުންގެ ވައުދު ބަލާލީމަ ހީވަނީ، ޕްރެޒިޑެންޝަލް ކެންޑިޑޭޓެއްގެ ވައުދުހެން. މަޖިލިސް މެމްބަރ ގެ މޭންޑޭޓް ކެންޑިޑޭޓަށް އެނގޭތޯ ބައްލަވާ! މޭންޑޭޓް ނޭނގޭ މީހުން ވައްދައިފިއްޔާ ސިޔާސީގޮތުން "ހަށިވއްކާ" މީހަކަށް މަޖިލީހުގައި އޭނާ ވެދާނެ." ޝެއިޚް އަނީލް ވިދާޅުވިއެވެ
ޝެއިޚް އަނީލްގެ އިތުރު ޓްވީޓެއްގައި ވިދާޅުވެފައިވަނީ "ބަނދަރާއި މަގުތައް ހަދާދިނުމާއި މިއީ މެމްބަރެއްގެ މަސައްކަތެއް ނޫން. މިކަންކަމަށް ވަކާލާތު ކުރެވިދާނެ. ސަރުކާރާއި ވާހަކަ ދެއްކިދާނެ. "ބަނދަރު އަޅައިދޭނަން"، "މަގުހަދައިދޭނަން"، "ފްލެޓް އަޅައިދޭނަން"، މިއީ ރައްޔިތުން ގުނބޯލިހައްދަން ދައްކާ ވާހަކަ." މިހެންނެވެ.
މަޖިލިސް އިންތިޚާބު ކުރިމަތިވަމުން އަންނައިރު އެއް ކެނޑިޑޭޓަކަށްވުރެ އަނެއް ކެންޑިޑޭޓްގެ ވައުދުތައް ބޮޑުކުރެވޭތޯ ދަނީ މަސައްކަތް ކުރަމުންނެވެ. ޝެއިޚް އަނީލް ވިދާޅުވި ފަދައިން ބައެއް ކެންޑިޑޭޓުންގެ ފަރާތުން އެކަށީގެންނުވާފަދަ ވައުދުތައް ވެސް ވަމުންދާ ކަން ފާހަގަ ކުރެވެއެވެ.