ފައިސާގެ ދަޅަދައްކައިގެން ގައުމިއްޔަތު ފުނޑާލާ ފަސާދަ އުފައްދަން ނޫޅުއްވުމަށް ދީނީ އިލްމުވެރިޔާ ޝެއިޚް އަލީ ޒައިދު ވިދާޅުވެއްޖެއެވެ.
ޝެއިޚް ޒައިދު މިކަމަށް އަލިއަޅުއްވާލައްވާ ދެ ޓްވީޓެއް ކުރައްވާފައިވެއެވެ.
ފުރަތަަމަ ޓްވީޓްގައި ވަނީ ފާޅުކަންބޮޑު ނުބައި ވާހަކަތަކާއި ނުބައި މަޤްސަދުތައް އެކުލެވޭ ސިއްރު ޕްލޭންތަކަށް ހުރިހާ ރައްޔިތުންވެސް ސަމާލުވެ ތިއްބެވުމަށް އެދިވަޑައިގެންފައެވެ.
"ފާޅުކަންބޮޑު ނުބައި ވާހަކަތަކާއި، ނުބައި މަޤްސަދުތައް އެކުލެވޭ ހިޑްން ޕްލޭންތަކަށް، އެންމެހާ ލޮބުވެތި ރައްޔިތުން ސަމާލުވެގެން ތިއްބެވުން އެދެން! ރުފިޔާ ފައިސާއިން ޖީބު ފުރިޔަސް، ކަށްވަޅަށްދާނީ ހަމަ ހުސްއަތާ. މުސްލިމުންނަށް އާޚިރަތް ވެސް އެބައޮތް! މިކަން ހަނދާން ނައްތާލައިގެން ނުވާނެ!" ޝެއިޚް ޒައިދު ވިދާޅުވިއެވެ.
Faalhukan bodu nubai vaahakathakaa, nubai magsadh thah ekulevey hidden plan thakah, enmehaa lobuvethi rayyithun samaal vegen thihbevun edhen! Rufiyaa faisaa in jeebu furiyas, kahvalhah dhaanee hama hus athaa. Muslimunnah aakhirai ves eba oi! Mikan handhaan nahthaalaigen nuvaane!
— Ali Zaid (@alizaid1000) March 13, 2019
ޝެއިޚްގެ ދެވަނަ ޓްވީޓްގައި ވަނީ "ރުފިޔާ ފައިސާގެ ދަޅަ މީހުންނަށް ދައްކައިގެން މިތާނގައި 800 އަހަރުއްސުރެ އޮތް އިސްލާމްދީނާއި، އިސްލާމީ ގައުމިއްޔަތާއި އަޚްލާގިއްޔަތު "ފުނޑާލާ" ފަސާދަ އުފައްދަން ނޫޅުއްވާ!މިފަދަ މީހުންނަށް ކުރިޔަށްއޮތް އިންތިޚާބުގައި ދިވެހި އެއްވެސް މުސްލިމް ރައްޔިތަކު ވޯޓު ނުދިނުމަށް އަޅުގަނޑު ގޮވާލަން!" މިފަދައިންނެވެ.
Rufiyaa faisaa ge dhalha meehunnah dhakkaigen mithaangai 800 aharun sure oi Islam dheenaa, Islamee Qaumiyyathaa, akhlaaqiyyath 'fundaalai' fasaadha ufahdhan noolhuhvaa! Mifadha meehunnah, kuriyah oi inthikhaab gai dhivehi ehves muslim rayyithaku vote nudhimah alhugandu govaalan!
— Ali Zaid (@alizaid1000) March 13, 2019
މިއީ ސީދާ ކޮން ބޭފުޅަކަށް އަމާޒުކުރެއްވި ވާހަކަފުޅެއް ކަމެއް ޝެއިޚް ވިދާޅުވެފައެއް ނުވެއެވެ. އެހެން ނަމަވެސް އއ. ތޮއްޑޫގައި އެމްޑީޕީން ބޭއްވި ޖަލްސާގައި ވާހަކަ ދައްކަވަމުން އެމްޑީޕީގެ ރައީސް މުހައްމަދު ނަޝީދު ވަނީ ގެސްޓު ހައުސްގެ ވިޔަފާރި ރަށްތަކުގައި ކުރިއަރައިގެން އަންނަނީ އެއްވެސް އިރެއްގައި ދިވެހިން އެކަން ދުށް ގޮތަކަށް ނޫންކަމަށް ވިދާޅުވެފައެވެ. އަދި ދުނިޔޭގެ އެންމެ ގިނައިން ވިކޭ ތަކެތީގެ ތެރޭގައި ރާ ހިމެނޭ ކަމަށާއި، އޭގެ ސަބަބުން އިތުރަށް މުއްސަނދިވެގެން ދާނެކަމަށް ވެސް ވަނީ ވިދާޅުވެފައެވެ.
ނަޝީދުގެ އެ ވާހަކަތަކުގެ ސަބަބުން ވަރަށް ގިނަ ފަރާތްތަކެއްގެ ފާޑުކިޔުންތައް ނަޝީދަށް ވަނީ އަމާޒުވެފައެވެ.