ރާއްޖޭގެ މަރުކަޒީ ބޭންކް، މޯލްޑިވްސް މަނިޓަރީ އޮތޯރިޓީ (އެމްއެމްއޭ) ގެ ގަވަރުނަރު އަހްމަދް ނަސީރު މިރޭ ފުލުސް އޮފީހަށް ހާޒިރުވުމަށް އަންގައިފި އެވެ.
ނަސީރުގެ މައްސަލައެއް ބަލަމުން އަންނަ ކަމަށް ފުލުހުން މި ހިނގާ މާޗު މަހުގެ ފަސްވަނަ ދުވަހު ބުނެފައިވާއިރު، ފުލުހުން ބަލަމުން އަންނަނީ ނަސީރު، ޤާނޫނީ މަސްއޫލިއްޔަތު އަދާކުރުމަށް ހުރަސްއެޅި ކަމަށް ތުހުމަތު ކުރެވޭ މައްސަލައެކެވެ. ފުލުހުން ވަނީ އެ މައްސަލަ ބަލަމުން އަންނަކަން ބައެއް މީޑިޔާތަކަށް ކަށަވަރު ކޮށްދެއްވާފައެވެ. ނަމަވެސް މައްސަލައިގެ ތަޙުޤީޤު ކުރިއަށްދާތީ އިތުރު ތަފްސީލެއް ހާމައެއް ނުކުރެއެވެ.
މަޢުލޫމާތު ލިބޭ ގޮތުގައި ނަސީރާ ދެކޮޅަށް މައްސަލަ ހުށައެޅީ އެމްއެމްއޭގެ ފައިނޭޝަލް އިންޓެލިޖެންސް ޔުނިޓްގެ ވެރިޔަކަށް ހުންނެވި އަބްދުﷲ އަޝްރަފެވެ. އޭނާ ވަނީ ޔާމީންގެ ވެރިކަމުގެ ފަހުކޮޅު މަގާމުން ދުރުކޮށްފައެވެ.
އަޝްރަފް މަޤާމުން ދުރުކުރީ ކުރީގެ ރައީސް ޔާމީންގެ މަނީ ލޯންޑަރިންގެ މައްސަލައެއް އެފްއައިޔޫ އިން ބަލަން ފެށުމުންނެވެ. އެނގިފައިވާ ގޮތުގައި އަޝްރަފް ނަސީރާ ދެކޮޅަށް މައްސަލަ ހުށައެޅީ އޭނާގެ ގާނޫނީ މަސްއޫލިއްޔަތު އަދާ ކުރަން އުޅުމުން ވަޒީފާއިން ވަކިކޮށް މަސްއޫލިއްޔަތު އަދާ ކުރުމަށް ހުރަސްއެޅި ކަމަށް ބުނެއެވެ.