އިންޑިއާގެ އެކްސްޓާނަލް އެފެއާޒް މިނިސްޓަރު ސުޝްމާ ސްވަރާޖު އަންނަ އާދީއްތަ ދުވަހު ރާއްޖެ ވަޑައިގަތުމަށް ހަމަޖެހިފައިވާކަމަށް މީޑިއާތަކުން ރިޕޯޓު ކޮށްފިއެވެ.
މީޑިއާ ރިޕޯޓުތައް ބުނާ ގޮތުގައި ސުޝްމާ ސްވަރާޖު ރާއްޖެ ވަޑައިގަތުމުގެ ރަސްމިއްޔާތުގެ ތައްޔާރީތައް ދިވެހި ސަރުކާރުން ވަނީ ފަށާފައެވެ. ނަމަވެސް ފޮރިން މިނިސްޓްރީން ރަސްމީކޮށް މި ކަމާއި ގުޅޭގޮތުން ވާހަކައެއް ނުދައްކަވައެވެ.
ސުޝްމާ ރާއްޖެ ވަޑައިގަންނަވާ ދަތުރުފުޅާއި ގުޅޭ ގޮތުން އިންޑިއާއިންވެސް އަދި އެއްވެސް ވާހަކައެއް ނުދައްކަވައެވެ.
ރައީސް އިބްރާހިމް މުހައްމަދު ސޯލިހު ރައީސް ކަމުގެ ހުވާ ކުރެއްވި ފަހުން ރާއްޖެ އާއި އިންޑިއާ އާއި ދެމެދު ގުޅުން ވަނީ ވަރަށް ބޮޑަށް ރަނގަޅުވެފައެވެ. ރައިސް ސޯލިހު ހުވާ ކުރެއްވުމުގެ ރަސްމިއްޔާތަށް އިންޑިއާގެ ބޮޑުވަޒީރު ނަރެންދުރަ މޯދީ ވަޑައިގެންނެވި އިރު ރައިސް ސޯލިހު ވަނީ ރަސްމީ ދަތުރުފުޅެއްގައި އިންޑިއާއަށް ވަޑައިގެންފައެވެ.
ރާއްޖޭގެ ހާރިޒީ ވަޒީރު އަބްދުﷲ ޝާހިދު އާއި ބައެއް ވަޒީރުންވެސް ވަނީ ރަސްމީ ދަތުރުފުޅުތަކުގައި އިންޑިއާއަށް ވަޑައިގެންފައެވެ. އަދި އިންޑިއާއިން ވަނީ ރާއްޖެއަށް 1.2 ބިލިއަން ރުފިޔާ ބަޖެޓް ސަޕޯޓަށް ދިނުމަށް ނިންމާފައެވެ.