މާލެއިން ފުރައިގެން ސ.މީދޫއަށް ދަތުރުކުރި އެރަށު އަލްމާ ބޯޓު ފަރަށް އަރައިފިއެވެ.
އެމްއެންޑީއެފް މީޑިއާ އޮފިޝަލް ކެޕްޓަން އިބްރާހިމް އާޒިމް ވިދާޅުވީ އަލްމާ ބޯޓު މީދޫ ނެރުބައްތީގެ އިރު ދެކުނު ފަރަށް އެރުމާއި ގުޅިގެން އެމްއެންޑީއެފް ސަދަން އޭރިއާގެ ކޯސްޓު ގާޑު ޓީމުން ހަރަކާތްތެރިވަމުން އަންނަ ކަމަށެވެ.
އާޒިމް ވިދާޅުވީ މިހާދިސާގެ މައުލޫމާތު އެމްއެންޑީއެފްއަށް ލިބިފައިވަނީ ރޭ 2:57 ހާއިރު ލިބުމާއި ގުޅިގެން ސަދަން ކޮމާންޑުގެ ޑައިވަރުންގެ ޓީމެއް އެސަރަހައްދަށް ގޮސް ހަރަކާތްތެރިވަމުން އަންނަ ކަމަށެވެ. އަދި ޑައިވަރުންގެ ޓީމުން ޑައިވްކޮޮށް ބެލި އިރު އަލްމާ ބޯޓުގެ ބަނޑުފިލާއިން 3 ފޫޓުތަނެއް ފޫ ގޮސްފައިވާ ކަމަށެވެ.
އެމްއެންޑީއެފް އާއި މީދޫގެ ރައްޔިތުންގެ އެހީގައި ބޯޓު ފުން ކުރުމުގެ މަސައްކަތް މިހާރު ދަނީ ކުރަމުންނެވެ.
މި ހާދިސާ ހިނގި އިރު ބޯޓުގައި 11 މީހުން ތިބިއެވެ. އެއީ 5 ދިވެހިންނާއި 6 ބިދޭސީންނެވެ. މިއިން އެއްވެސް މީހަކަށް ގެއްލުމެއް ލިބިފައި ނުވާކަމަށް އާޒިމް ވިދާޅުވިއެވެ.
އަލްމާ ބޯޓަކީ މީދޫ އާއި މާލެ ދަތުރު ކުރާ ބޯޓެކެވެ.